Ish-kryeministri i Britanisë së Madhe, Tony Blair mbërriti pasditen e kësaj të diele në Himarë, teksa pamjet kur zbriste nga helikopteri në stadiumin e Himarës u bënë lajm pothuajse në pjesën më të madhe të mediave online.
Ende nuk dihet arsyeja e vizitës së Tony Blair por nuk përjashtohen pushimet. Kjo është e disata herë që ish-kryeministri britanik viziton Shqipërinë. Ai ishte për të kaluar pushimet në vitin 2016 dhe 2021.
Por, ajo që ngre dyshime ështe se i kujt është helikopteri i cili solli Tony Blair-in në Himarë. Ajo që vihet re është se “kodi” i helikopterit është FA 633. Ky kod, përkon me helikopterin të llojit “Cougar”, të Ministrisë shqiptare tëë Mbrojtjes, ndërsa pamjet e helikopterit janë të ekspozuara edhe në “JetPhotos”.
Deri më tani, pamjet e helikopterit që ul ish-kryeministrin britanik janë të ndara vetëm në media, ndërsa ende nuk ka asnjë reagim nga Ministria e Mbrojtjes.
Nëse vërtet helikopteri me të cilin udhëtoi Tony Blair i përket Forcave të Armatosura shqiptare, atëhere ngrihen pyetjet:
- Përse u përdor helikopteri i ushtrisë për të lëvizur ish-kryeministrin britanik?
- Me udhër të kujt?
- Kush i mbulon shpenzimet e udhëtimit të Blair?
Me shumë gjasa, Tony Blair ka ardhur në vendin tonë për të kaluar pushimet, megjithatë nuk nguron që të shfrytëzojë lehtësitë që i ofrohen me shumë gjasa nga kryeministri Edi Rama.
*E themeluar në nëntor 2002, JetPhotos është zhvilluar në uebsajtin më të madh të fotografisë së aviacionit në internet. Që nga gushti 2015, JetPhotos është pjesë e shërbimit kryesor të gjurmimit të avionëve Flightradar24 dhe ofron fotografi në faqen e internetit dhe aplikacionet e kompanisë.
