Katër apartamente dhe 2 llogari bankare të Arben Ahmetajt do të vijojnë të mbeten nën sekuestron e Prokurorisë së Posaçme.
Edhe pse ish-zv/kryeministri nga arratia kërkoi nëpërmjet përfaqësuesve të lij ligjorë rrëzimin e vendimit të Shkallës së Parë për sekuestron e tyre, Apeli i GJKKO-së u shpreh sot me vendim duke lënë në fuqi konfiskimin e pronave.
Ahmetaj kërkërkoi në Apel kthimin e apartamentit në zonën e Shallvareve, 3 apartamenteve të tjera dhe 2 llogarive bankare në shumën e 124 300 eurove, të cilat mbahen të bllokuara nga Prokuroria e Posaçme në kuadër të hetimit të ish numrit dy të qeverisë për 3 vepra penale.
Mbi Ahmetajn rëndon një urdhër-arresti ndërkombëtar me masë dhënë në mungesë “Arrest në burg” për veprat penale: “Korrupsion”, “pastrim parash” dhe “fshehje pasurie”.
SPAK ka arritur të provojë përfshirjen e Arben Ahmetajt në aferën e inceneratorëve, lidhjen e tij me Klodian Zoton dhe Mirel Mërtirin, pronarët “de facto” të 3 djegësave në Fier, Elbasan dhe Tiranë, si dhe përfitimet financiare të ish-zv/kryeministrit.
Ahmetaj sakaq, u largua nga Shqipëria në kohën kur SPAK depozitoi në Kuvend kërkesën për marrjen e autorizimit për arrestimin e tij. Fillimisht në media qarkulloi lajmi se ai ka udhëtuar drejt Greqisë, ndërsa avokati i tij Henrik Ligori bëri të ditur në mbledhjen e Këshillit të Mandateve se ish-zëvendësi i Edi Ramës ndodhet në Britaninë e Madhe.
Njoftimi i SPAK mbi sekuestron:
“Prokuroria e Posaçme Kundër Korrupsionit dhe Krimit të Organizuar dhe Byroja Kombëtare e Hetimit në bashkëpunim me Drejtorinë e Përgjithshme të Policisë së Shtetit, në kuadrin e hetimit të procedimit penal nr. 277/1 të vitit 2022, të regjistruar për veprat penale të “Shpërdorimit të detyrës”, “Korrupsionit pasiv të funksionarëve të lartë shtetërore ose të zgjedhurve vendorë”, “Korrupsionit aktiv të funksionarëve të lartë shtetërore ose të zgjedhurve vendorë”, “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim” dhe “Pastrimi i produkteve të veprës penale ose veprimtarisë kriminale”, parashikuar respektivisht nga nenet 248, 260, 245, 257/a dhe 287 i K.Penal (procedim penal i regjistruar ndër të tjerë edhe në ngarkim të personit nën hetim Arben Ahmetaj), sot, më datë 18.07.2023 ka proceduar me kryerjen e kontrolleve dhe sekuestrove si më poshtë:
Në zbatim të vendimeve të Gjykatës së Posaçme të Shkallës së Parë Për Korrupsionin dhe Krimin e Organizuar Tiranë me nr.295 akti datë 16.07.2023 dhe nr.297 akti datë 17.07.2023 ka ushtruar kontroll në 7 (shtatë) banesa. Gjatë kontrollit janë gjetur dhe sekuestruar dokumente me interes për hetimin si dhe kompjuter lap – top, telefona celularë, USB etj të cilët do ti nënshtrohen verifikimeve të mëtejshme.
Në respektim të vendimit nr. 296 akti datë 17.07.2023 të Gjykatës së Posaçme të Shkallës së Parë Për Korrupsionin dhe Krimin e Organizuar ka proceduar me zbatimin e masës së sigurimit pasuror, sekuestro preventive mbi 6 (gjashtë) pasuri nga të cilat 4 (katër) apartamente (njëri i përshtatur si AIR BNB) në pronësi të personit nën hetim Arben Ahmetaj si dhe 2 (dy) llogari bankare të po këtij shtetasi në shumën 124 300 (njëqind e njëzetë e katër mijë e treqind Euro).”
