Ish-ministri i drejtësisë, Ylli Manjani ka folur mbi vendimin e qeverisë që të sigurohen me detyrim pronat nga tërmeti.
Manjani është shprehur se ky vendim është një vjedhje e pastër dhe këto ide të poshtra janë prova që duhet të bëhen në vendet e botës së tretë dhe jo në Shqipëri që është një vend europian.
“Taksa mbi banesën është një debat i përjetshëm në të gjithë vendet e botës. Si fillim duhet që shqiptarët duhet të pajisen me çertifikatën e pronësisë në fillim pasi kemi shumë pronarë pa certifikatë. Në momentin që ke certifikatën e pronësisë duhet të paguash një taksë mbi pronën dhe për këtë nuk kam asnjë vrejtje. Sigurimi i detyrueshëm është poshtërsi, vjedhje e pastër, unë nuk dua që ta siguroj shtëpinë nuk dua ta shes rriskun dua ta marr vetë në kurriz 100% nuk ke pse më detyron që të siguroj”, tha ai për Syri.net.
“Sigurimi i detyrueshëm është një vjedhje e pastër, taksa mbi banesën është detyrim kjo duhet të paguhet dhe nuk duhet të diskutojmë fare. Sigurimi i detyrueshëm nuk ka asnjë vend të botës por janë disa ide afrikane që vijnë dhe kërkohet të provohet në Shqipëri. Pse un duhet të paguaj taksa për shtëpitë e disa personave të papërgjegjshëm që kanë ndërtuar shtëpi në zona me rrisk të lartë përmbytjesh duke shkelur mbi ligjet e vendit. Kjo s’ka lidhje me socializmin kjo është një lëvizje banditeske dhe me lekët tona kërkojnë të mbushin llogarinë e një kompanie që po falimenton e në fund ti vjedhin. Shteti duhet që të japë një deklaratë që sot e tutje nuk jap asnjë cent për shtëpitë tuaja që janë ndërtuar pa kriter e më pas personat duhet të sigurohen sipas dëshirës në cilën kompani të duan ata dhe në këtë mënyrë funksionon tregu i lirë në vend”, shtoi.
