Kryeplaku i fshatit Kerr në Bashkinë Klos, Sali Muça, është dhunuar nga një bashkëfshatar i tij për shkak se ka kundërshtuar hapjen e një guroreje.
Në një prononcim për mediat, Sali Muça ka treguar se është dhunuar nga Besnik Muça, djali i Vehbi Muçës me të cilin ka pasur konflikte. Pas dhunës, kryeplaku i fshati ndodhet për mjekim në spital ndërsa ka bërë thirrje që të merren masa nga drejtësia dhe të zbatohen ligjet.
Sali Muça thekson se nuk është i vetmi që e kundërshton hapjen e gurores, por se ka ngritur shqetësimin edhe të banorëve të tjerë të fshatit.
“Kam qenë në kanalin vaditës, kur vjen Besnik Muça i cili ka ardhur menjëherë, më ka goditur me grushte disa herë, në fytyrë e në trup. Më pas është larguar. Unë kam ardhur në spital. Nuk kemi pasur konflikte e asgjë, me djalin. Por djali i tij merret me gurore, me pyje, për dëmtime me shumë gjëra në fshat, që ne nuk jemi dakord. Ai është një tip mashtruesi. Nga dhuna isha mbuluar me gjak, kam bërë kallëzim penal ne polici. Mbrëmë gjithë natën kam qëndruar në spital për mjekim, po ashtu edhe sot jam për mjekim. Nuk di nëse është marrë masë, por unë kam bërë denoncim direkt. Kërkoj të merren masa nga drejtësia, asgjë më shumë, por vetëm të zbatohen ligjet e shtetit”, ka thënë ai.
