Policia e Lezhës ka dalë me njoftim zyrtar lidhur me sherrin që ndodhi një ditë më parë në një pikë karburanti në Lezhë.
Blutë bëjnë me dije se lidhur me rastin janë arrestuar 3 persona, shtetasi nga Kosova, Migjen Mulaj 37 vjeç dhe shtetasit Nikoll Sokoli. 61 vjeç dhe Kujtim Rusi. 52 vjeç, banues në Lezhë. Të tre këta shtetas janë konfliktuar me njëri-tjetrin për motive të dobëta, dhe sherri ka degraduar në përdorimin e armëve të ftohta.
“Arrestimi i tyre u bë pasi në vijim të veprimeve të thelluara hetimore me qëllim zbardhjen e plotë të rrethanave të ngjarjes, ka rezultuar se:
Rreth orës 18:30 të ditës së djeshme, në ambientet e një karburanti në aksin rrugor Lezhë-Milot, shtetasi kosovar M. M. pas një konflikti të çastit për motive të dobëta që ka patur me dy shtetasit shqiptarë N. S. dhe K. R. (punonjës pranë këtij karburanti), i ka goditur fillimisht fizikisht dhe më pas me automjetin e tij ka tentuar që ti përplasë duke u rrezikuar jetën. Si pasojë e tentativa me automjet, shtetasi M. M. është përplasur me ambientet e brendshme të karburantit, duke i dëmtuar.
Në vijim të konfliktit, dy punonjësit e karburantit e kanë goditur shtetasin M. M. me mjete të forta në trup (shkopinj) duke i shkaktuar dëmtime fizike, i cili aktualisht ndodhet në spital jashtë rrezikut për jetën.
Në spital për ndihmë mjekësore, ndodhet edhe shtetasi N. S. i cili ka marrë gjithashtu dëmtime fizike, por jashtë rrezikut për jetën”,- njofton Policia.
Materialet procedurale iu referuan Prokurorisë për veprime të mëtejshme.
