Ndërprerjet e energjisë elektrike në pikun e sezonit turistik kanë ngritur pikëpyetje mbi efiçencën e miliardave të shpenzuara nga autoritetet e linjës.
Të shpeshta kanë qenë ndërprerjet e energjisë kryesisht në bregdet, ndërsa sipas raportimeve mediatike, kanë çuar edhe në largimin e turistëve.
E njëjta situatë është shënuar edhe gjatë kësaj të Shtune.
Raportohet se Radhima, Orikumi dhe më tej Llogaraja e Dhërmiu, prej dy orësh, nuk furnizohen me energji elektrike.
Nga ana tjetër, OSHEE ka konfirmuar mungesën e energjisë elektrike prej mesditës edhe në qytezat më në jug deri në Sarandë.
“Për shkak të avarisë në linjën 35kV Saranda 1 – Bunec sot në orën 12.00 kanë mbetur pa energji disa zona në Sarandë: Borsh, Lukovë, Krekës, Shënvasil, Nivicë. Grupet e OSSh Sarandë janë në terren dhe po punojnë për eleminimin e avarisë dhe rikthimin e energjisë tek të gjithë abonentët”, thuhet në një njoftim të OSHEE, që nga ana tjetër nuk ka një sqarim për mungesën e energjisë elektrike nga Radhima në Llogara.
Shërbimi i munguar si dhe treguesit zyrtarë flasin për një performancë jo të mirë të institucionit shtetëror. Të dhënat e INSTAT në muajin Mars treguan se gjatë vitit të kaluar humbjet ishin gati dy herë më të larta krahasuar me periudhën paraardhëse dhe vijojnë të mos reduktohen tashmë prej katër vjetësh.
Prokurimet e dyshimta të institucionit, investimet e akuzuara korruptive të qeverisë si rasti i anijeve-gjeneratorë të vendosura në Triport të Vlorës apo menaxhimi i diskutueshëm i kaskadave nga KESH kanë ngritur shqetësimin për shpërdorim të parave të taksapaguesve të destinuara për përmirësimin e sistemit energjitik në vend.
