Policia e Tiranë ka reaguar në lidhje me arrestimin në Itali të 49-vjeçarit Artur Doku alias Gent Sherifi, i cili kërkohej prej vitesh nga drejtësia shqiptare.
Kapja e tij në Itali është bërë pas dërgimit të informacionit nga Interpol Tirana. Ai ishte shpallur në kërkim ndërkombëtar pasi Gjykata e Apelit Tiranë e ka dënuar me 15 vjet burgim, për veprat penale “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe i municionit”.
Artur Doku alias Gent Sherifi akuzohet për një vrasje dhe plagosaje të regjistruar në vitin 1997. Policia njofton se vijojnë procedurat për ekstradimin e këtij shtetasi nga Italia drejt vendit tonë.
Si ndodhi ngjarja:
Artur Doku, bashkë me kushëririn e tij, Besim Doku (i dënuar me 23 vjet burgim), akuzohen se më 19 maj të vitit 1997 vranë me armë zjarri Ilmi Çukën dhe plagosën vëllain e tij, Dalip Çukën, pas një konflikti që kanë pasur për çështje nderi.
Për këtë ngjarje, Artur Doku dhe Besim Doku kanë qenë të arrestuar edhe më parë, por, në vitin 2001, ata u liruan për mungesë provash nga Gjykata e Tiranës. Për këtë çështje, ka pasur edhe një verifikim nga Këshilli i Lartë i Drejtësisë, ku pretendohej se gjykata e kishte liruar pa të drejtë Besim Dokun. Madje, në vitin 2003, KLD-ja mori vendim për shkarkimin e një gjyqtari, pasi një ndër shkeljet që pretendohej se ishte kryer prej tij, kishte të bënte me çështjen për Besim Dokun, duke trajtuar si shkelje ligjore mosmarrjen pjesë të prokurorit.
Sipas dosjes penale, Artur dhe Besim Doku janë kushërinj midis tyre dhe banonin së bashku me familjen Cuka në lagjen Bregu i Lumit në Tiranë. Izmir Doku, i cili ka vdekur para disa vitesh, ka qenë baxhanak me të dëmtuarin Dalip Çuka. Më vonë e fejuara e Izmir Dokut prishi fejesën dhe martohet me Bardhyl Cenën nga Kukësi. Gjithashtu, familja Çuka, në afërsi të banesës ka një lokal. Në vitin 1996, me qëllimin që makinat të mos kalonin me shpejtësi në rrugën para lokalit, hapën një kanal. Prishja e fejesës dhe hapja e kanalit, i cili pengonte qarkullimin normal të automjeteve sollën një zënkë midis viktimës Izmir Doku dhe të dëmtuarit Mexhit Çuka, e cila më pas u bë shkas për ndodhjen e ngjarjeve shumë të rënda.
Rezulton e provuar se më 19 maj 1997, rreth orës 21.00, Dalip Çuka së bashku me viktimën Ilmi Çuka dhe Bardhyl Cenën po ktheheshin nga fshati Laknas për te Bregu i Lumit. Dalip Çuka ka qenë në sediljen e parë të autoveturës me targë të Shkodrës në krah të shoferit Bardhyl Cena, ndërsa Ilmi Çuka ka qenë në sediljen e pasme. Sapo kanë mbërritur në lagjen Bregu i Lumit, në afërsi të klubit të shtetasit Sami Delia, në një distancë rreth 10 metra larg shtëpisë së tyre u dalin përpara të pandehurit Artur Doku, Besim Doku dhe Izmir Doku, të cilët mbanin në duar armë automatike. Artur Doku dhe Besim Doku kanë qëlluar me armët automatike në drejtim të autoveturës. Për pasojë plagoset dhe më pas vdes në spital Ilmi Çuka, ndërkohë që mbetet i plagosur edhe Dalip Çuka.
