Një shtetas është arrestuar dhe një tjetër është shpallur në kërkim ditën e sotme në Kurbin, pasi akuzohen për shitje të kanabisit.
Blutë bëjnë me dije se në pranga ka rënë shtetasi me iniciale I.N, 23 vjeç pasi në bashkëpunim me shtetasin A.GJ, kishin përshtatur lokalin për shitje të kanabisit. Shtetasi A.GJ është shpallur në kërkim.
“Specialistët e Seksionit për Hetimin e Narkotikëve të DVP Lezhë dhe ata të Komisariatit të Policisë Kurbin, në bashkëpunim me Prokurorinë e Lezhës, kanë vijuar veprimet e thelluara hetimore për përcaktimin e plotë të autorësisë së veprimtarisë kriminale të shitjes në doza të lëndës narkotike cannabis sativa, në qytetin e Kurbinit, rast i cili u godit më datë 27.06.2023, si rezultat i operacionit policor të koduar “Ndërthurja”.
Nga këto veprime, u vu në pranga shtetasi I. N., 23 vjeç dhe u shpall në kërkim shtetasi A. Gj., 23 vjeç, të dy banues në Kurbin, pasi nga hetimet rezultoi se janë të përfshirë në veprimtarinë kriminale të shitjes në doza të lëndës narkotike cannabis sativa.
Vijon puna për kapjen e shtetasit A. Gj“,- njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme.
