Albana Vokshi denoncon se drejtuesit e poliklinikave në Tiranë po kërcënohen nga eprorët për të pushuar nga puna mjekët pranë këtyre qendrave, vetëm sepse ndjekin specializimet në QSUT.
Vokshi ka shpërndarë në “FB” një mesazh për të cilin thotë se ka ardhur në adresë të saj. Dërguesi prezantohet si mjeke në një nga poliklinikat e Tiranës dhe ngre shqetësimin se drejtorëve të poliklinikave në kryeqytet po u bëhet presion për shkëputjen nga puna të mjekeve që ndjekin specializimin.
“Veprim ky totalisht i paligjshëm, thuhet në mesazh, pasi në asnjë pikë ne nuk cënojmë kontratën e punës”.
E gjithë lufta, shkruan dërguesi, bëhet për të liruar vende pune të cilat do t’ju jepen atyre që i janë premtuar në fushate.
Dhe kjo, vijon denoncimi, vjen në ditët kur vendi ynë ka nevojë më shumë se kurrë për këta mjekë.
Mesazhi
Në mesazhin dërguar deputetes, shkruhet:
Pershendetje e nderuar! Une qe po ju shkruaj jam mjeke ne nje nga poliklinikat e Tiranes njekohesisht specializante ne qendren universitare Nene Tereza! Dua tju ve ne dijeni te nje problemi i cili ka kohe qe na shqeteson dhe nuk kemi zgjidhje pasi edhe instancat nuk jane ne dijeni! Drejtoresha e operatorit rajonal Suida Kuka dhe ajo e Tiranes Bora Salaj disa here mbledhin drejtoret e poliklinikave duke ju bere presjon per shkeputjen nga puna te mjekeve qe ndjekin specializimin, veprim ky totalisht i paligjshem pasi ne asnje pike ne nuk cenojme kontraten e punes!
E gjithe lufta behet per te liruar vemde pune te cilat do tju jepen atyre qe i jane premtuar ne fushate! Presjon verbal i bere ne mbledhje duke detyruar drejtuesit e qendrave shendetesore te jene ne nje vorbull e te ndermarrin nisma te paligjshme per te hequr mjeket nga puna, ne ditet kur vendi yne ka nevoje me shume se kurre per keta mjeke! Lutem ta beni me dije kete problem! Ju faleminderit!
Vokshi: Fajtor Rama dhe Manastirliu
Deputetja demokrate Albana Vokshi, në komentin që shoqëron denoncimin e mjekes, shkruan se për situatën e rëndë në fushën e shëndetësisë në të cilën ndodhet vendi, është fajtor kryeministri Edi Rama dhe Ministrja e Shëndetësisë Ogerta Manastirliu.
“Pse ikin mjekët??? Lexoni denoncimin se si Drejtuesit e Poliklinikave shantazhohen nga drejtuesit e Operatorit rajonal Suida Kuka dhe të Tiranës Bora Salaj, që të ndërpresin marrëdhëniet e punës me mjekët specializantë e t’i zëvendësojnë me ata që i kanë dhënë votat Partisë-Shtet. Prej vitit 2014, Shqipëria llogaritet të ketë eksportuar rreth 1500 mjekë vetëm në Gjermani, ndërsa largime ka pasur edhe drejt Italisë, Anglisë, Shteteve të Bashkuara, Kanadasë dhe Francës. Edi Rama dhe Ogerta Manastirliu, janë nxitësit kryesorë të eksodit të pandalshëm të mjekëve me politikat e nismat antishëndetësore, antisociale, antiligjore, antikushtetuese e antikombëtare”, shkruan Vokshi, e cila ka kundërshtuar si deputete edhe nismën e fundit të miratoi qeveria, që parashikon të mos lejojë studentët e mjekësisë të largohen nga vendi për një periudhë 5-vjeçare pas përfundimit të studimeve. Projektligji u miratua nga mazhoranca në seancën e fundit plenare, që shpresojnë të ndalojnë eksodin e bluzave të bardhë me këtë nismë që kundërshtohet si nga vetë studentët e mjekësisë ashtu dhe opozita si dhe mjekë të shquar.
Një tjetër debat është hapur për gjendjen e sistemit, pas rastit të aktorit dhe pedagogut Genc Fuga, i cili pësoi goditje në tru dhe u detyrua që të paguajë një operacion që kushtoi 19 mijë euro në një spital privat, pasi QSUT nuk e mundëson ndërhyrjen.
Mjeku Erion Dasho shprehet se një qytetar me të ardhura normale që e ka të pamundur të sigurojë një shumë të tillë, dënohet në një farë mënyre me vdekje.
“Jo vetëm favorizohet privati, por penalizohet pacienti. Një ndërhyrje që kushtonte 19 mijë euro, shumë që qytetari shqiptar nuk e ka të disponueshme”, tha Dasho në një emision televiziv.
Mjekja shqiptare e cila punon në Gjermani, Aurora Dollenberg shprehet se nëse rasti i Fugës do të ndodhte në këtë shtet, atëherë, “gjysma e spitalit, dhe personelit të spitalit, nga kryeshefi dhe mjeku do të pushohej nga puna nëse pacienti shkon e spitali nuk ta ofron këtë shërbim. Është shteti që duhej tia ofronte këtë shërbim”.
