Pavarësisht akordit paraprak që ishte arritur, duket se është vendosur përfundimisht se Alfred Mensah nuk do të rikthehet tek Skënderbeu, të paktën jo këtë merkato. Shkak u bë ecuria e Partizanit në kupat e Europës dhe operacioni që iu nënshtrua së fundmi sulmuesi ganez.
Nisur nga kjo situatë, Skënderbeu është hedhur direkt në merkato për të gjetur një tjetër sulmues, që pritet të shoqërojë Jordan Fletcher, në majën e sulmit të bardhekuqëve për këtë sezon.
Burime të mediave lokale bëjnë me dije se korçarët janë në bisedime të avancuar me një sulmues nigerian. Bëhet fjalë për futbollistin Boubacar Djibrill Goumey, i datëlindjes 14 Korrik 2000 (23 vjeç). Sezonin e fundit ai ka qenë pjesë e ekipit Zakho SC në Irak, teksa ka provuar të veshë edhe fanellën e Nigerisë me moshat.
Mësohet se drejtuesit e Skënderbeut janë prej kohësh në bisedime me këtë futbollist, teksa tani presin vetëm një përgjigje nga ana e tij, për të nisur më pas procedurat për ardhjen e tij në Shqipëri.
