Kryetari i Partisë së Lirisë, Ilir Meta ka folur për “fenomenin” e mbiçmimit të lekut në Shqipëri.
Në një reagim në llogarin e tij në Facebook, Meta shkruan se mbiçmimi i lekut po sjell pasoja negative në të gjithë ekonominë e vendit. Sipas tij, këtë këtë gjë nuk mund ta vlerësojë as kryeministri Edi Rama dhe askush tjetër, pasi sipas tij është diçka e organizuar qëllimisht në mënyrë që të përfitojë një pakicë dhe të dëmtohet shumica e qytetarëve shqiptarë.
Politikani shton se mbiçmimi i lekut ka ulur vëllimin e eksporteve dhe ka përkeqësuar bilancin e pagesave, gjë e cila sipas Metës do të ketë pasoja negative në rritjen e ekonomise.
“Mbiçmimin e Lekut, i cili po sjell pasoja negative në të gjithë ekonominë, nuk mund ta vlerësojë as kryeministri dhe askush tjetër, për arsye se gjithçka është fiktive, spekulative dhe e organizuar qëllimisht në mënyrë që të përfitojë një pakicë dhe të dëmtohet shumica e qytetarëve shqiptarë.
Mbiçmimi i Lekut ka ulur vëllimin e eksporteve, ka përkeqësuar bilancin e pagesave dhe do të ketë pasoja negative në rritjen ekonomike.
Gjithashtu mbiçmimi i Lekut ka goditur të gjitha familjet shqiptare që përfitojnë nga remitancat, kreditorët, si dhe bizneset, eksportuesit, kontratat e të cilëve janë në monedhën euro”, shkroi Ilir Meta.
