Gazetari Ferdinand Dervishi ka zbuluar skemën se si sipas tij, kundërshtarët e Ervis Martinaj arritën ta fusnin atë në kurth.
I ftuar në emisionin “Review” në Euronews Albani, ai tha se bëhet fjalë për një ngjarje të cilën vetë nuk e ka hasur as nëpër filma apo libra që ka lexuar pasi kundërshtarët e Martinaj janë treguar aq të zgjuar saqë nuk i kanë lënë atij hapësirë të dyshonte se i kishin ngritur kurth.
“A kërkonte ky Ervis Martinaj, paguante njerëz të ndryshme e thoshte “më sill kokën e tij”. Kjo u përdor në të kundërt të tij. Kundërshtarët e tij u mblodhën dhe në mënyrë shumë të zgjuar, unë s’e kisha hasur as nëpër filma e libra që kam lexuar, ata marrin një nga kundërshtarët kryesorë të tij në marrëveshje dhe i ngrenë një grackë. Ata e lidhin në një karrige dhe me miratimin e tij fillojnë ta filmojnë kur dy persona e qëllojnë dhe e bëjnë gjak realisht këtë njeri. Ata i çojnë video Vis Martinaj dhe i thonë këtë po kërkon ti? Hajde e mere se e kemi ne. Ai i bindur nga videoja që ishte krejtësisht origjinale, ra në kurth dhe ata e kapën dhe kjo është historia e tij. Kjo është histori që policia pa dyshim e di, ka vajtur edhe në objekte të ndryshme, por nuk kanë gjetur asnjë provë”, tha Dervishi.
Rreth një vit më parë, Ervis Martinaj u denoncua i zhdukur në polici nga familjarë. Që prej asaj kohe, autoritetet kanë dështuar të thonë fjalën e fundit për fatin e njeriut që njihet si ish-mbreti i kumarit – a është vrarë apo zhdukja ka qenë një inskenim? Pas atentateve brutale që kanë ndodhur në vend, është aluduar se mund të fshihet dora e Martinajt. Megjithatë, të gjitha kanë mbetur vetëm hipoteza.
