Ngjarja e rëndë që ndodhi një ditë më parë në Maliq, ku një 55-vjeçar vrau gruan dhe e hodhi në një gropë me ujëra të zeza, vijon të jetë nën hetim nga policia, ndërsa detaje të reja dalin në dritë.
Pasi vrau gruan e tij (Liza Mullalli, 46-vjeç) dhe e hodhi në gropën septike, autori i krimit Gjergji Mullalli u largua nga vendi i ngjarjes.
Por arratia e tij zgjati shumë pak, pasi mëngjesin e sotëm, 55-vjeçari, u gjet në një banesë të braktisur në fshatin Zëmblak. Menjëherë sapo konstatoi forcat e policisë, ai ka hapur zjarr drejt tyre. Në pamjet e publikuara shihet se si efektivët tentojnë të bëjnë negociata me të që të dorëzohet, por 55-vjeçari ka qëlluar në drejtim të efektivëve duke rrezikuar jetën e tyre, dhe më pas ai është vetëvrarë, me armën e krimit që vrau bashkëshorten.
“Pamje me dron gjatë operacionit të shkallës së lartë të vështirësisë për lokalizimin dhe kapjen e autorit të vrasjes së bashkëshortes së tij shtetases L. M, 46 vjeçe, ndodhur mbrëmjen e djeshme në fshatin Zëmblak, Maliq.
Shtetasi Gj. M., 55 vjeç, pasi ka parë policinë, duke ju rrezikuar seriozisht jetën punonjësve të Policisë.
55-vjeçari në pamundësi për t’u larguar, pasi zona ishte e rrethuar nga punonjësit e Policisë dhe i është bërë thirrje e herëpashershme për t’u dorëzuar, ka hapur zjarr drejt punonjësve të policisë dhe në pamundësi për t’u larguar autori Gj. M., ka vrarë veten”, njofton policia. Ndërkohë, po sipas burimeve nga Policia Mullali para se të vriste veten, kishte shkruar letër që do të kryente krimin.
Luiza Mullalli, nënë e 3 fëmijëve, kishte marrë urdhër mbrojtje, pasi bashkëshorti 55-vjeçari e dhunonte prej kohësh. Ka qenë i ati i 46-vjeçares që ka konfirmuar këtë detaj për mediat, duke thënë se urdhrin e mbrojtjes e kishte prej një viti.
“Erdhëm në shtëpi, mori djali se e kishte marrë në telefon për të biseduar. Më mori djali në telefon më thotë hajde se s’ma ngre telefonin se kushedi ca ka ndodhur. Erdha në shtëpi, erdhi djali në shtëpi, lajmëruam policinë, kërkuam vërdallë derisa e gjetën ata të policëve. E kishte hedhur nga veranda. Na ndaluan policët. Kishin konflikte, kishte 1 vit me urdhër mbrojtje. E dhunonte vajzën dhe mori urdhër mbrojtje”, thotë i ati Avzi Ferati.
Ndërkohë nga ana tjetër nëna e të ndjerës, tregon se çifti kishte probleme, ishin në proces divorci, jetonin në shtëpi të ndara dhe autori nuk donte as 3 fëmijët e tij. Ndërsa hedh pretendime se vrasja është paguar nga motra e autorit që ndodhet në Amerikë.
“Trupin e gjetën policët. Unë e kërkova nëpër parcela. Këtë më bëri, më vrau e kunata që ka ardhur nga Amerika. Ajo ka paguar kriminelin që më vrau çupën”, shprehet nëna e viktimës.
Ndërsa nëna e autorit 55-vjeçar, i cili u vetëvraa me armën e krimit që vrau bashkëshorten një natë më parë të fshatit Zëmblak, thotë se u njoftua për ngjarjen tragjike, mbrëmë në mesnatë. E moshuara tregon se nuk ka pasur asnjë kontakt me të birin prej ditësh.
“Për nusen e mora vesh mbrëm nga mesnata, teksa flisnin njerëzit. Këtu ishin mbledhur shumë njerëz. Isha mbrapa derës kur më thanë se ai e ka vrarë Lizën. Gjergji qëndroi mbi 20 vite në Greqi, kanë tre fëmijë, njëra është e martuar dhe ka fëmijë, tjetra pritet të martohet, ndërsa djalin e ka 21 vjeç. Gjergjin për herë të fundit e kam takuar para 3 ose 4 ditësh sepse ikte shpejt gjithmonë”, u shpreh e moshuara.
Gjergj dhe Luiza Mullalli, ishin në proces divorci. Për shkak të dhunës së vazhdueshme që bashkëshorti ushtronte ndaj saj, Luiza Mullalli kishte kërkuar të ndahej. Kjo dyshohet të ketë qënë dhe arsyeja që çoi në ngjarjen e rëndë me dy viktima.
Familja Mullalli ka hapur sot dyert e mortit, për të përcjellë në banesën e fundit burrë e grua, të cilët lanë pas tre fëmijë.
