Policia e Shtetit ka zhvilluar aksion në disa qytete, ku janë arrestuar disa policë dhe prokurori i rrethit Kukës.
Nga mega-opracioni i shtrirë në disa qytete nga Policia e Shtetit janë arrestuar biznesmeni i njohur Pëllumb Gjoka dhe ish-drejtori i Forcave Operacionale, Oltion Bistri, Xhevahir Lita, drejtuesi i Prokurorisë së Rrethit Kukës dhe Astmer Bilali, pjesë e grupit ‘Bajri’.
Nga detajet e para të mediave bëhet me dije se biznesmeni Pellumb Gjoka është ndaluar në orët e parat të mëngjesit të sotëm në banesën e tij në Velipojë.
Po ashtu RENEA dhe policia e Shkodrës po bëjnë kontrolle edhe në zonën e Dobraçit tek fisi ‘Bajraj’ ndërsa dyshohet për një të ndaluar në atë zonë. Po ashtu efektivet kanë bërë edhe sekuestrim automjetesh ndërsa aksioni vijon dhe mund të ketë të ndaluar të tjerë.
Xhevahir Lita është prokuror i emëruar në Shkodër. Prej më shumë se një viti ai është caktuar përkohësisht nga Këshilli i Lartë i Prokurorisë në pozicionin e Drejtuesit të Prokurorisë Kukës, pas arrestimit për korrupsion të kreut të asaj zyre, Edmond Karriqi.
Operacioni u shtri në disa qytete, mes tyre dhe Tirana dhe Shkodra.
Pritet që në orët në vijim të ketë më shumë informacion dhe një konferencë zyrtare në orën 10:00, duke bërë një bilanc të qartë sesa është bilanci i të arrestuarve dhe i personave që do shpallen në kërkim.
- Kush është biznesmeni Pëllumb Gjoka i shpallur investitor strategjik nga Qeveria Rama
Mësohet se në mesin e të arrestuarve është biznesmeni Pëllumb Gjoka, i cili është i njohur për lidhje me politikën dhe është shpallur investitor strategjik nga qeveria Rama.
