Lefter Maliqi, ish-kandidati i koalicionit ‘Bashkë Fitojmë’ për Bashkinë e Kuçovë, i cili nuk mundi të dalë fitues vetëm për më pak se 400 vota dhe që ka kërkuar një hetim të thelluar për rezultatin të cilin e konsideron të manipuluar, ka falënderuar votuesit.
Në një takim të zhvilluar pasditen e djeshme, Maliqi shprehet optimist se e vërteta do të triumfojë dhe se manipulimi i votave do të zbardhet.
Po kështu Maliqi është i bindur se vjedhja e votave u bë nga Salillari me urdhër të Ramës dhe se e drejta do të triumfojë e krimi do të ndëshkohet.
“Takim falenderues në Kozare-Kucovë. Thirrje për bashkim dhe punë të palodhur në bazë, riorganizim dhe shtim radhësh në çdo Qendër Votimi në fshat dhe Qytet.
Mirënjohje banorëve të Kozares, për fitoren në 14 Maj, që nga Frashëri, Gega, Driza, Kozarja, Havaleas, Vlashuk, Zdravë, Demollarët, Salcë Kozare, Ferras dhe Fier Nimar! Fitorja ishte kudo në 3 ish-Komunat Perondi, Kozare, Lumas, që përbëjnë më shumë se gjysma e votuesve të Bashkisë Kuçovë, por gjithashtu u fitua dhe Lagjia “11 Janari” (Vidhat), Kuçova e Vjetër dhe pati një rezultat si asnjëherë me parë në shumë Qendra Votimi në qytet. Bashkia Kuçovë u fitua mëgjithëse u nda me rezultat të ngushtë.
Me gjithë problemet e brendëshme të PD dhe PL, megjithëse kishte kandidatë dhe Alibeaj, ne përsëri fituam, por mafia shtetërore, çakulli e asfalti elektoral, Oligarku Salillari, 2 firma të tjera ndërtimi, ish-Ministri i Rendit me banditë e ish-drejtues policie, blerje, manipulime, ndërrimi i kutive në vendin e krimit të KZAZ, me dyer të fshehta, që lidhnin Qendrën e Kulturës me “Shkollën e Mesme” ish Teknikumi, me procesverbale të fallsifikuara dhe shumë prej tyre bosh, mungesa procesverbaleve origjinale, vula të hedhura, fletë votimi tepër, 1254 raste të votimit në grup, formula e ‘trenit bullgar’, plot shkelje të tjera dhe përsëri ja dolëm më të fortë se kurrë! “SPAK”, të korruptuarit dhe shkelësit e “Kodit Zgjedhor” i ka nën hetim, bashkë me Oligarkun, ‘ish-fatorinon’ Salillari dhe ‘pengun’ e tij Hajdarin e Partisë.
Hetime që mund të zgjasin por që me vullnet të mirë, do të zbardhin çdo gjë, me ndëshkime ligjore. Mirenjohje strukturave të PD Kozare, të Opozitës dhe mbeshtetësve të majtë për fitoren.
Mbetemi më të motivuar se kurrë, deri në fitore dhe mbajtjen e premtimeve, për ta kthyer Kozaren dhe Bashkinë Kuçovë në “Kantier Ndërtimi! S’ka kthim pas, takime, frymë optimizëm, shtim radhësh me fitore dhe përballje dinjitoze, për fitoren në sfidat në vazhdim. Duhet punë e palodhur çdo ditë në bazë, bashkim, përballje, jo me xhelozi, paaftësi dhe marrje meritash nga servila! Punë çdo ditë dhe vota përcakton çdo gjë. Riorganizim, zgjedhje, shtim radhësh nga organizatat, grupseksionet, degët dhe kryesia, në bazë dege dhe delegimet nga qendra në bazë qarqesh, duke punuar çdo ditë me mobilizim total”, shkruan Maliqi.
