Ivan Gvozdenoviç ka mbetur i kënaqur nga mënyra se si luajti skuadra e tij në miqësoren ndaj Dinamos.
Trajneri i korçarëve, gjithashtu bën të ditur se ekipi i tij nuk e mbyllur ende merkaton, ndërsa mund të vijnë përforcime të tjera.
“Rezultati në këtë fazë të përgatitjeve nuk ka shumë rëndësi. Ajo që ka rëndësi për mua është fakti se ekipi po funksionon mirë dhe mbi të gjitha kemi rifituar tifozët. Jemi duke punuar për të bërë mirë në çdo ditë stërvitje. Kjo ishte një ndeshje shumë e bukur, por duhet të jemi më mirë në finalizim, pasi patëm raste për të shënuar më herët. Jam i kënaqur me mënyrën si vrapon ekipi dhe kjo është pozitive, pasi, edhe pse kanë marrë ngarkesë po përgjigjen mirë. Presim të bashkohen lojtarët që i kemi të konfirmuar dhe më pas do të shohim ekipin e plotë. Gjithsesi, jemi ende aktivë në merkato”, ka thënë trajneri i Skënderbeut për “Panorama Sport”.
