Një 52-vjeçar shqiptar është gjetur pa shenja jete në rajonin e policisë në Kalkidha, 70 km në veri-lindje të Athinës.
Viktima është identifikuar si Kastriot Periku, nga Skrapari.
Sipas policisë lokale, ngjarja ka ndodh gjatë orëve të natës të së enjtes 20 korrik.
Sipas njoftimit për shtyp të drejtorisë së policisë të Kalkidhës, shtetasi shqiptar ishte ndaluar prej policisë dhe mbahej në qeli për t’u dërguar në gjykatë për masë sigurie. Në rrethana që ende nuk dihen, ai u gjet i varur me një çarçaf në kangjellat e qelisë. Menjëherë u dërgua në spital, por mjekët nuk mundën ta shpëtonin.
Lidhur me incidentin, prokuroria ka hapur një hetim, ndërsa policët dhe oficeri i rojës janë marrë të pandehur nën akuzën e shkeljes së rregullave të shërbimit.
