Detaje të reja kanë dalë në dritë nga vrasja e Nikolin Lekstakaj në Balldre të Lezhës, një ditë më parë.
Ditën e sotme është zbardhur dhe ekspertiza mjeko-ligjore, në të cilën sqarohet se në drejtim të Lekstakajt është qëlluar 5 herë, ndërsa 4 plumba i kanë shpuar trupin, e një prej tyre zemrën.
Nikolin Lekstakaj u ekzekutua me breshëri kallashnikovi nga persona të paidentifikuar sapo doli nga një market, ku ishte futur për të blerë një pije freskuese. Autorët qëlluan nga një makinë e zezë në lëvizje. Ndërkohë ditën e sotme policia ka shoqëruar 5 persona, të cilët dyshohet se janë implikuar në ngjarje.
Hetuesit besojnë se ngjarja mund të jetë hakmarrje pas vrasjes së Ardian Nikulaj 3 muaj më parë. Fisi Lekstakaj ka qenë në një konflikt të hershëm që ka sjellë edhe viktima me fisin Nikulaj.
