Ish-kryeministri Sali Berisha në një mbledhje me grupin parlamentar, ka komentuar ligjin për kanabisin mjekësor nga qeveria, ku tha se me këtë të fundit po bën që Shqipëria të kthehet në një narkoshtet.
Berisha tha se kanabisi është një substancë që mbjell krim dhe vetëm krim.
“Ligji i kanabisit, i narkoshtetit. Asgjë se justifikon kanabisin, por me Ramën Shqipëria është narkoshtet, tipik dhe i vetëm në Evropë dhe kanabisi mbulon vendin, po ashtu dhe lulëkuqja, po mbillen dhe ju garantoj se do zëvendësojnë të gjithë prodhimet e tjera, pasi janë më të shtrenjta. Këta nuk flasin fare, bëhen mashtrime policiore, pasi janë të gjithë socialistë dhe mbrohen nga partia. Pasojat katostrofale janë mbi shëndetin mendor, një substancë që mbjell krim dhe vetëm krim. Do t’i kundërshtojmë me forcën më të madhe”, tha ai.
Sakaq Berisha komentoi dhe pezullimin e fondeve nga Komisioni Europian për bujqësinë, ku tha se kjo erdhi si pasojë pasi në vendin tonë ato vidhen dhe shpërdorohen.
“Sot njoftohet se Komisioni Europian pezulloi për shkak të korrupsionet fondet për bujqësinë, që janë jetike por përfundojnë të gjitha sipas hetimit shpërdorohen dhe nuk çohen në destinacion. Ndaj na del dhe akademia e çobanëve tani dhe materniteti i mushkave”, tha Berisha.
Berisha u ndal po ashtu edhe te arratisja e Arben Ahmetaj, ku tha se: “Sot ka polemikë në çdo familje, në çdo bisedë: vjedhja e tmerrshme me inceneratorë dhe arratisja e tmerrshme e Arben Ahmetajt. Ju e dëgjuat në fjalën e tij 16-minutëshe, kreu i organizatës kriminale të inceneratorëve, nuk shqiptoi njëherë fjalën arratisje. Ajo për Edi Ramën nuk ka ndodhur, sepse e ka porositur vetë. Shtetit i arratiset zyrtari i dytë më i lartë i ekzekutivit. Për bosin e organizatës kriminale, kjo nuk ka ndodhur. Ndaj dhe me një paturpësi dhe cinizëm ekstrem, rrahte gjoksin, fliste për drejtësinë me ministrat në arrati dhe nuk fliste për arratinë dhe paturpësinë në një mungesë totale respekti ndaj qytetarëve. Në një papërgjegjësi të plotë, në një apel të hapur për secilin nga zyrtarët e tij që të arratisen në rast se thirren nga drejtësia.
Gjushi meriton një dekoratë që nuk u arratis. Shikoni Gjushin dhe i çonin policinë, që ti thonin të ikte. Por Gjushi nuk iku, pse, e di ai vetë. Kurse ky, i arratiset dhe nuk flet asnjë fjalë, çka do të thotë se ju të tjerët, njëri pas tjetrit.
A ka kjo paturpësi, hipokrizi dhe cinizëm më të madh ndaj shqiptarëve?
Afera e inceneratorëve është afera e inceneratorëve, sikundër arratisja e Ahmetajt është arratisja e shekullit.”
