Personat që shihni në fotot e mëposhtme janë shtetasit Ergin Peposhi, 19 vjeç dhe Ardit Peposhi, 16-vjeç, të cilët humbën jetën në aksidentin tragjik të regjistruar pasditen e djeshme në Edesa të Greqisë.
Ata ishin kushërinj të parë me njëri-tjetrin (djem xhaxhallarësh) dhe mësohet se ishin nisur për të punuar në Greqi si punonjës sezonalë të mbledhjes së qershive, tek babai i Erginit.
Të dy ata ishin pasagjerë në makinën që u përplas me kamionin, dhe bashkë me ta humbën jetën dhe shoferi Besim Muçaj, 55 vjeç, nga Durrësi; Ilir Daci, 50-vjeç dhe Gazment Brahaj, 47-vjeç.
Mjeti tip “Mercedec Benz”me targa shqiptare “AA 989 MU” me të cilin po udhëtonin pesë viktimat u përplas “kokë më kokë” me një kamion. Sipas mediave greke, “Benz-i” ka dalë nga korsia e vetë në rrethana ende të pazbardhura dhe ka hyrë në korsinë e gabuar, duke u përplasur më pas me kamionin. Përplasja ka qenë aq e fortë sa e vetmja pjesë e makinës që ka mbetur e paprekur ka qenë bagazhi.
Të gjithë personat që ndodheshin në mjet gjetën vdekjen në vendin e ngjarjes. Për nxjerrjen e trupave të tyre u desh ndërhyrja e forcave zjarrfikëse, ndërsa policia në vendngjarje nisi hetimet për zbardhjen e rrethanave të këtij aksidenti.
