Një operacion i përbashkët është zhvilluar mes policisë shqiptare dhe asaj italiane për të arrestuar dy trafikantë droge të shpallur në kërkim ndërkombëtar.
Në kuadër të operacionit policor të koduar “RUGANTINO” janë vënë në pranga shtetasit Tonin Kameri alias Aleks Ionescu, 44 vjeç dhe Pavlin Bregaj alias Pavlin Tuku, 32 vjeç, të dy banues në Lezhë.
Ata janë kjapur në Lezhë, pasi akuzohen nga Gjykata e Brescia-s, si pjesëtarë të një organizate kriminale për trafikimin e lëndëve narkotike. Ndaj këtyre 2 shtetasve, Gjykata e Brescia-s, Itali, ka caktuar masën e sigurisë “Arrest në burg”, për veprën penale “Organizata kriminale me qëllim trafikimin e lëndëve narkotike”.
Policia ka ndaluar edhe shtetasin Dritan Marku alias Dritan Kameri, 48 vjeç, banues në Lezhë, pasi dyshohet se me vullnetin e tij të lirë, ka lejuar kushëririn e tij, shtetasin Tonin Kameri alias Aleks Ionescu, që t’i përdorë identitetin për t’iu shmangur Policisë italiane.
“Nga veprimet hetimore të kryera në Itali, dyshohet se shtetasit Tonin Kameri alias Aleks Ionescu dhe Pavlin Bregaj alias Pavlin Tuku, së bashku me 7 shtetas të tjerë të arrestuar tashmë nga policia e Italisë, janë pjesëtarë të një organizate kriminale për trafikimin e kokainës, organizatë me veprimtari në Itali. Gjatë zhvillimit të këtij operacioni, Policia e Italisë ka sekuestruar në cilësinë e provës materiale, rreth 7 kg lëndë narkotike kokainë.” thuhet në njoftimin e Policisë.
Interpol Tirana dhe Interpol Roma vijojnë bashkëpunimin, me qëllim ekstradimin e këtyre shtetasve drejt Italisë.
