Kuvendi do të mblidhet ditën e sotme, ndërsa në rend dite është parashikuar që disa institucione si KQZ, Autoriteti i Dosjeve, ILDKPKI, INSTAT, të pasqyrojnë raportin për veprimtarinë vjetore.
Ndërkohë, kreu i grupit të PD-së, Gazment Bardhi kërkon ndryshimin e rendit të ditës, nisur nga vendimi i djeshëm i Këshillit të Mandateve, ku PS dhe PD ranë dakord për heqjen e mandatit të Arben Ahmetajt.
Edhe gjatë seancës së djeshme, opozita kërkoi që SPAK-ut t’i hapet rruga që ditën e nesërme për arrestimin e Ahmteajt. Megjithatë mazhoranca vendosi që seanca plenare të mbahet të Hënën pasdite.
SPAK kërkon nga Kuvendi autorizim për arrestimin e ish-ministrit të Financave Arben Ahmetaj, të cilin e akuzon për korrupsion pasiv, fshehje pasurie dhe pastrim parash. Sipas akuzës, Ahmetaj ka përfituar qindra mijëra Euro nga Klodian Zoto dhe Mirel Mërtiri duke i favorizuar që kompanitë e tyre dhe të tjera të lidhura me të ashtuquajturit bosët e inceneratorëve të përfitojnë tre kontratat koncesionare për inceneratorët e Elbasanit, Fierit dhe Tiranës. Vetë Ahmetaj, siç kanë konfirmuar avokatët e tij, nuk ndodhet në Shqipëri.
