Deputetja Jorida Tabaku, në një deklaratë për mediat, tha se Partia Demokratike ka bërë mbi 11 padi në SPAK për inceneratorët, 50 persona janë akuzuar ndërsa 21 janë para drejtësisë.
Ajo tha gjithashtu se ka dorëzuar në SPAK në emër të partisë Demokratike mbi 20 CD me prova dhe fakte të siguruara gjatë komisionit hetimor të mbajtur për inceneratortët.
“I kam vendosur SPAK në dispozicion mbi 20 CD me prova dhe fakte. SPAK ka marrë të zbardhura të gjitha dëshmitë e të gjithë personave që kanë dëshmuar në tre javët e fundit në këtë komision. Kur flasim për një qeverisje të kapur duhet të kemi parasysh aferën e inceneratorëve.
Aty shteti është vendosur në shërbim të një grupi të strukturuar kriminal duke i shërbyer atij dhe duke i vendosur në dispozicion çdo instancë të qeverisë dhe të administrimit publik atyre dhe nevojave të tyre”,- tha Tabaku.
Tabaku i bëri thirrje publike Arben Ahmetajt të bashkëpunojë me drejtësinë. Ajo tha se në aferën e inceneratorëve Arben Ahmetaj nuk është fajtori i vetëm, pasi aty janë përfshirë edhe shumë të tjerë që duhet të dalin para drejtësisë, ndërsa Ahmetaj mund të ndihmojë që kësaj afere mund t’i shkohet deri në fund.
“Kam një thirrje për Ahmetajn, thirrja imë është bashkëpunoni me drejtësinë, SPAK, shqiptarët kanë nevojë që ti shkohet kësaj afere deri në fund”, tha Tabaku.
