Flamurtari ka nisur sot punën për sezonin e ri, me trajnerin Emiljano Çela i cili ka dalë për herë të parë në fushën stërvitore me futbollistët që ka në dispozicion për këtë edicion në Kategorinë e Parë.
Tekniku ka pranuar këtë sfidë te vlonjatët, të cilët synon që t’i kthejë në elitë me një grup të bërë thuajse nga e para.
Afrime me emër nga Superiorja, por edhe lojtarë “të shtëpisë” që janë kthyer pas disa vitesh në gjirin e klubit në akademinë e të cilit janë formuar.
Çela ka mbajtur një fjalim të shkurtër para skuadrës, duke ftuar futbollistët që të bëjnë maksimumin për të arritur objektivin, i cili është qartësisht ngjitja në elitë në edicionin e ardhshëm. “Të ndjehemi krenarë dhe me fat që përfaqësojmë një klub të madh si Flamurtari”, ishin fjalët e teknikut para se të niste stërvitjen e parë të skuadrës.
Tekniku do të implementojë idetë e tij mbi lojtarët dhe këtë duket se ka nisur ta bëjë që tani.
Me një postim në Instagram, Çela ndan një sekuencë taktike të një aksioni sulmues me ngjyrat kuqezi sigurisht prezente. Këtë skemë, Çela e ‘fakton’ teksa ndan gjithashtu një video ku Kastrioti i tij shënonte thuajse identik.
