Ashtu siç u raportua më herët në media, Policia bën me dije se një i afërm i kushërinjëve Bilbil dhe Jashar Maja, ka marrë kërcënime në rrjetet sociale, pas ngjarjes së ndodhur pak ditë më parë, ku këta të fundit u dhunuan brutalisht nga të afërm të deputetit Rrahman Rraja (përfshirë vëllezërit dhe djalin e tij) vetëm për shkak se u ankuan se gurorja e Rrajave në Borizanë të Fushë Krujës u dëmtonte banesat.
Policia bën me dije se shtetasi Lulzim Maja, 43 vjeç, banues në Borizanë, Krujë, ka kallëzuar se në llogarinë e profilit të tij në Facebook ka marrë disa mesazhe me përmbajtje kërcënuese, nga një llogari e panjohur.
Mesazhet po hetohen nga agjentët e krimi kibernetik të kryeqytetit he pritet që prokuroria e Tiranës të nisë hetimet nën akuzën për veprat penale “Kanosja” dhe “Përdorimi me keqdashje i thirrjeve telefonike”
Njoftimi:
Me datë 10.07.2023, është paraqitur pranë Sektorit për Hetimin e Krimeve Kibernetike në DVP Tiranë shtetasi L. M., 43 vjeç, banues në Borizanë, Krujë, i cili ka kallëzuar se në llogarinë e profilit të tij në Facebook ka marrë disa mesazhe me përmbajtje kërcënuese, nga një llogari e panjohur.
Pas kallëzimit të marrë nga 43-vjeçari, specialistët e Sektorit për Hetimin e Krimeve Kibernetike kanë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, për veprat penale “Kanosja” dhe “Përdorimi me keqdashje i thirrjeve telefonike”, për veprime të mëtejshme procedurale.
