Janë zbardhur detaje të reja nga dosja hetimore në lidhje me kërkesën e SPAK drejtuar Kuvendit të Shqipërisë për arrestimin e ish-zëvendës kryeministrit dhe ish-ministrit të Financave, Arben Ahmetaj.
Si provë në dosje për të vërtetuar miqësinë e Arben Ahmetajt me biznesmenët e inceneratorëve është dhe aksidenti i regjistruar në korrik të vitit 2017 në Kumanovë të Maqedonisë së Veriut. Ollga Gjokaj, bashkëshortja e këshilltarit të Arben Ahmetajt ka treguar në dëshminë e saj se në automjet me Ahmetajn ishte edhe biznesmeni Mirel Mërtiri.
“Bashkëshorti i saj i ka thënë që po udhëtonte në makinë me Leonard Menen që është kunati i Arben Ahmetajt dhe Mirel Mërtiri. Bashkëshorti i ka dhënë se janë përplasur me një autobus. Bashkëshorti i saj u dëmtua pak dhe nuk pati nevojë për mjekim kurse Arben Ahmetaj dhe Leonard Mene it ha që ishin dëmtuar dhe janë trajtuar me mjekim në Kumanovë edhe në Shqipëri. Nuk di të thotë spitalet apo ambientet mjekësore ku janë mjekuar.
Por di të thotë që ka vajtur bashkë me bashkëshortin për vizitë te shtëpia e Albinës dhe Arbenit pas aksidentit. Kur ka ndodhur aksidenti, ka dëgjuar nga bashkëshorti se kanë qenë në një udhëtim në Bukuresht”, ka deklaruar Ollga.
Këshilli i Legjislacionit dhe Imuniteteve në Kuvendin e Shqipërisë pritet të shqyrtojë kërkesën e prokurorisë të martën, ndërsa Kuvendi i Shqipërisë pritet të votojë në seancë plenare. Ahmetaj është deklaruar më herët i pafajshëm ndaj akuzave. Ai nuk ka bërë komente publike pas lajmit të kërkesës së SPAK në Kuvend.
