Erjon Hoxhallari, Bruno Lulaj dhe Albi Doka mendojnë se Tirana mund të kualifikohet në turin e dytë të Konferencë Ligës.
Pranojnë se skuadra ka analizuar gjatë kundërshtarin dhe se bardheblutë janë optimistë për atë që do të japin në fushë.
Tre mbrojtësit e skuadrës besojnë te gjërat e mëdha. Kapiteni Erjon Hoxhallari deklaron se gjithçka e vendos sfida e parë dhe nëse Tirana fiton, shkon në Gjeorgji për të mbrojtur rezultatin.
“Mungesa ime është më e paktë. Albi ka tri vite, unë vetëm një sezon. Rikthehem përsëri dhe jam i lumtur që rikthehem në familje. Të luash në Europë ka të mirat e veta, por shtëpia mbetet shtëpi. Këtu vlerësohesh më shumë, sepse ti ke arritur shumë gjëra të mëdha. Jemi optimistë. Futboll luajmë. Të dyja skuadrat hyjnë për të fituar. Ne kemi objektivin tonë. Po analizojnë kundërshtarin. Shpresojmë që të marrim maksimumin nga ndeshja e parë. Më e rëndësishmja në fund është kualifikimi, por mendoj se ndeshja e parë është ajo që vlen shumë, sepse nëse marrim rezultat pozitiv në sfidën e parë ke atë komoditetin për të mbrojtur rezultatin në transfertë. Gjithsesi, ne hyjmë në ndeshje për të dhënë maksimumin dhe për të marrë maksimumin”, është shprehur Erjon Hoxhallari.
Si Bruno Lulaj dhe Albi Doka e shohin Tiranën më pranë kualifikimit. Ata pranojnë se skuadra ka organikë të mjaftueshme për të arritur kualifikimin.
“Forma e skuadrës është shumë e mirë. Falë zotit, faza shkoi në mënyrën më të mirë të mundshme. Nuk kishim dëmtime. Kemi punuar maksimalisht për të arritur objektivin që është të kalojmë turin kundër Dinamos së Batumit. Këto ditë gjërat kanë qenë ndryshe. Ngarkesa ka qenë shumë më e madhe, sepse vetë periudha e kërkon këtë gjë që të jemi sa më gati për ndeshjen e 13 korrikut. Kundërshtarin e kemi studiuar. Së bashku me profesorin e kemi analizuar në videoanaliza. Kemi parë që kanë pika të forta, por edhe pika të dobëta. Shpresojmë që të marrim maksimumin. Jemi shumë të sigurt te vetja jonë që mund të bëjmë më të mirën. Në këtë ndeshje shkojmë me bindje që do të kalojmë turin”, tha Lulaj.
Albi Doka mendon se ai është kthyer në shtëpi dhe projekti i Halilit do të jetë fitues.
“Dy javë kam që u bashkova me ekipin. Janë shumë lojtarë të ardhur. Duhen pak kohë për ekipin. Ndihem shumë mirë. Mezi kam pritur që të vij këtu dhe të shohim sesi do të shkojnë gjërat. E ndjeva menjëherë atmosferën e familjes, sepse këtu jam rritur. Këtu e kam nisur si futbollist. Ndihem si në shtëpi. Është një ndeshje shumë e fortë. Kimi analizuar kundërshtarin. Një ekip i kalueshëm, por është ndeshje shumë e fortë. Me ardhjet e reja dhe me trajnerin Shehi dhe investimin e presidentit për këtë projekt. Besoj se mund ta kalojmë kundërshtarin”, mbylli Albi Doka.
