Skuadra e Tiranës po mbyll përgatitjet e fundit për pjesëmarrjen në Ligën e Konferencës. Bardheblutë dje zhvilluan stërvitjen e parë në Shqipëri pas kthimit nga Maqedonia e Veriut.
Por për të motivuar edhe më shumë ekipin ka menduar presidenti i bardhebluve, Refik Halili, i cili ka zbritur personalisht në fushën e lojës.
Ai dje ka qenë i pranishëm në stërvitjen e bardhebluve, jo vetëm duke ndjekur nga afër atë, por edhe duke folur drejtpërdrejt me ekipin. Ashtu siç bën zakonisht numri 1 i bardhebluve, biseda me ekipin ka qenë gjatë seancës stërvitore, ku ai ka mbledhur lojtarët në fushën e lojës.
Në fjalimin e tij të shkurtër, ai ka kërkuar impenjimin maksimal për të kaluar turin e parë, që është objektivi minimal i skuadrës në këtë edicion. Para skuadrës ka folur edhe trajneri Orges Shehi. Dy drejtuesit për 20 minuta kanë diskutuar gjatë me skuadrën.
Tani është zyrtare që Erhun Obanori nuk do të vishet bardheblu. Lojtari nuk u paraqit në stërvitjen e djeshme dhe normalisht ka mbyllur para kohe bashkëpunimin me Tiranën.
Nuk do të jetë pjesë e Tiranës as Besir Iseni. Lojtari do të shohë një aventurë tjetër në Kosovë ose Maqedoni. Iseni është dënuar 24 muaj nga Disiplina për ngjarjet e ndodhura në kampionatin shqiptar, pikërisht në sfidën me Bylisin.
