Katër persona në Dibër janë proceduar penalisht për prerje të kundërligjshme të pyjeve dhe ndërtim pa leje.
Dy prej tyre, 36 dhe 32 vjeç nga Bulqiza u proceduan pasi u kapën teksa transportonin me automjetet e tyre dru për zjarr, të cilët ishin prerë në kundërshtim me ligjin. Për dy të tjerët nga Dibra, 64 dhe 65 vjeç, nisi procedimi penal pasi u konstatuan duke kryer punime për ndërtimin e dy objekteve, pa u pajisur me leje.
“Në zbatim të detyrave të lëna nga Drejtori i Përgjithshëm i Policisë së Shtetit, për vigjilencë të shtuar dhe për angazhim në terren, me fokus parandalimin dhe goditjen e krimeve ndaj mjedisit, shërbimet e Drejtorisë Vendore të Policisë Dibër dhe të komisariateve në varësi, kanë intensifikuar kontrollet dhe si rezultat kanë evidentuar dhe goditur 4 raste të tyre.
Për këto raste u referuan materialet në Prokurori ku nisi procedimi në gjendje të lirë për shtetasit:
A.C., 36 vjeç, banues në Zall-Bastar; P.Gj., 32 vjeç, banues në Bulqizë, pasi u kapën teksa transportonin me automjetet e tyre, dru për zjarr, të cilët ishin prerë në kundërshtim me ligjin. Sasia e druve dhe automjetet u sekuestruan në cilësinë e provës materiale.
Gjithashtu nisi procedimi penal për shtetasit V.I., 65 vjeç; B.T., 64 vjeç, banues në Dibër, pasi u konstatuan duke kryer punime për ndërtimin e dy objekteve, pa u pajisur me lejen e organeve përkatëse.”- njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme.
