Në atentatin e regjistruar mesnatën e kaluar në fshatin Larushkë të Fushë Krujës, ka qenë vetëm një dëshmitar, përveç dy fëmijëve të mitur të Gentjkan Bejtja, të cilët mbetën të plagosur, ku 13-vjeçari Alvi Bejtja ndodhet në gjendje të rëndë në spital.
Dëshmitari është banor në të njëjtën lagje me Bejtjen. Ai ka rrëfyer për hetuesit se pas krismave, ka parë nga dritarja tre persona që po largoheshin dhe momentin kur ata kanë qëlluar edhe njëherë, rreth 20-25 metër larg vendit të ngjarjes, ku edhe janë gjetur 4 gëzhoja.
Për shkak të ndriçimit të kufizuar dëshmitari nuk ka mundur të identifikojë, apo fiksojë shenja dalluese tek autorët. Sipas burimeve, janë administruar edhe pamjet e një kamere sigurie në banesën e Gentian Bejtjes.
Kujtojmë se si pasojë e të shtënave të kallashnikovit humbi jetën kunati i Gentjan Bejtjas, Ramazan Sino, 29 vjeç, si dhe u plagosën dy fëmijët e Bejtjes, përkatësisht 13 dhe 10 vjeç.
Gentjan Bejtja dyshohet se ishte shënjestra e atentatit edhe pse në momentin e krimit nuk ka qenë në banesë.Ai dyshohet se dy ditë më parë ka qenë në shtëpi dhe se mund të ketë qenë në automjet me viktimën mbrëmjen e djeshme, por ka zbritur më parë.
Gentjan Bejtja është personazh i njohur i botës së krimit, i cili iu ka shpëtuar dhe dy atentateve të mëparshme, teksa i ka dalë emri si i përfshirë dhe në shumë ngjarje kriminale.
