Janë zbardhur detaje të reja në lidhje me atentatin e regjistruar mesnatën e kaluar ndaj familjes së Gentian Bejtjes në fshatin Larushk të Krujës, ku mbeti i vrarë kunati i tij Ramazan Sino, 46 vjeç dhe i plagosur djali i tij Alvi Bejtja, 18 vjeç.
Nga hetimet paraprake dyshohet se ka qenë një atentat i mirëmenduar mafioz dhe autorët i kanë zënë pritë shënjestrës. Burime bëjnë me dije se autorët kanë qëlluar ndaj kunatit dhe të birit të Gentjan Bejtjes, sapo ata kanë zbritur nga automjeti.
Dyshohet se autorët kanë qenë tre persona, të cilët kanë ndjekur lëvizjet e viktimës dhe të plagosurit. Ndërkohë në zonë nuk ka kamera sigurie pasi u hoqën në kuadër të operacionit të policisë ‘Fijet’.
Policia ka gjetur një automjet të djegur tip “Volkswagen”, rreth orës 00:40, te lapidari në Tapizë dhe dyshohet se iu përket autorëve.
Grupi hetimor nën drejtimin e Prokurorisë ndodhet në vendngjarje dhe vijon veprimet hetimore për sekuestrimin e provave me qëllim identifikimin dhe kapjen e autorit/ëve.
Kush është Gentjan Bejtja
Gentjan Bejtja së bashku me Enver Stafukën, ishin personat që vodhën makinën e përdorur për vrasjen e kryekomisar Dritan Lamajt në shkurt të vitit 2013. Gjithashtu, ish-polici Bejtja i ka shpëtuar edhe një atentati me minë të telekomanduar në vitin 2016.
Bejtja i ka shpëtuar edhe më parë atentatit, ku në vitin 2022, ndaj tij është qëlluar me breshëri kallashnikovi teksa lëvizte me makinë në zonën e Niklës, i shoqëruar nga Klodian Stafuka. Në atë kohë Gentian Bejtja mbeti i plagosur.
Gentjan Bejtja rezulton person me precedentë penalë të mëparshëm në fushën e veprave penale kundër personit dhe pronës, si dhe i arrestuar me arsenal armësh në banesë.
