Armando Dobra e ka nisur sezonin e ri me të njëjtin frymëzim para portës siç mbylli atë të kaluarin.
Futbollisti i cili në të kaluarën ka veshur fanellën e përfaqësueses Shpresa, ka shënuar dy gola që në ndeshjen e parë të fazës përgatitore për klubin e Çesterfilld.
Në ndeshjen e sotme të skuadrës së kategorisë së pestë angleze ndaj Motlok Taun, të parën e fazës përgatitore, ekipi i Dobrës fitoi me shifrat e thella 9-0.
Sulmuesi shqiptar ishte planifikuar të aktivizohej në pjesën e parë, por pastaj në fund trajneri vendosi që ta hidhte në fushë në fraksionin e dytë të lojës, duke formuar dyshen e sulmit me ish-sulmuesin e Irlandës së Veriut, Uill Grig.
Të dy shënuan nga dy gola në pjesën e dytë, duke treguar se merren vesh mjaft mirë, ndonëse Grig i është bashkuar vetëm gjatë merkatos së verës klubit i cili ka ambicie për t’u ngjitur në këtë edicion, teksa në të kaluarin u mposht vetëm në play-off.
