Flamurtari kërkon Olauale Onanugën.
Mësohet se Emiljano Çela ka në listën e dëshirave nigerianin dhe direkt kanë nxituar që t’i ofrojnë bashkëpunimin. Trajneri e njeh mirë mesfushorin, pasi e ka pasur pjesë të organikës te Kastrioti.
Dhe jo vetëm vjet, por edhe në sezonin 2021-2022. Kjo shkëndijë ka mjaftuar që të nisin edhe bisedimet për transferimin e tij në Vlorë. 25- vjeçari nuk është i shumëshëtitur dhe në CV-në e tij ka vetëm eksperiencën me krutanët. E megjithatë, kjo nuk i pengon vlonjatët që ta tentojnë.
Cilësitë i ka më shumë se të mira, i përshtatur me futbollin shqiptar është dhe mbi të gjitha ka mjaftueshëm minuta në këmbë. Në dy vitet e fundit ka marrë 3872 minuta nga 58 ndeshje në total. Gazeta zbulon se me nigerianin ka qenë në kontakt të drejtpërdrejt vetë trajneri memaliot, ndërsa i ka bërë edhe ofertën konkrete, pasi ka diskutuar edhe me drejtuesit e klubit.
Olauale Onanuga është larguar nga Kastrioti direkt pasi i skadoi kontrata. E megjithatë, ai nuk rezulton i lirë në treg. Direkt ka nxituar që të gjejë ekip dhe ka përfunduar në Azerbajxhan. Kjo është pengesa që u ka dalë kuqezinjve. Në mes tashmë është edhe Kapaz PFK. Burimet bëjnë me dije, se mes Onanugës dhe azerëve ka tashmë një marrëveshje.
Por Flamurtari nuk tërhiqet. Mësohet se drejtuesit janë të gatshëm për të bërë sforco edhe në këtë rast. Duket se negociatat vijojnë edhe mes dy klubeve, ndërsa janë të gatshëm që të paguajnë edhe ndonjë para ekstra për Kapaz PFK. Një opsion mund të jetë edhe ardhja e nigerianit në huazim. E megjithatë, pritet që të shikohet se si do të zgjidhet kjo çështje në ditët në vijim dhe nëse do të mundësohet transferimi i 25-vjeçarit.
/Panoramasport
