Policia ka arrestuar tre persona nga Kurbini, pasi nën efektin e pijeve alkoolike, mesantën e kaluar kanë parkuar automjetin e tyre në mes të rrugës në Laç, prishën qetësinë publike, si dhe kanë kundërshtuar uniformat blu që ndërhynë për t’iu lëvizur automjetin dhe për të ndaluar zhurmën.
Në pranga janë vënë shtetasit Agron Sufa 24 vjeç, Klodian Lika, 24 vjeç dhe Algys Rica, 23 vjeç.
“Këta shtetas, mesnatën e djeshme, kanë parkuar automjetin e tyre në mes të rrugës kryesore të Laçit dhe dyshohet se nën efektin e pijeve alkoolike, kanë shkaktuar zhurmë duke vënë muzikë të lartë në automjet, sjellje e cila ka shqetësuar banorët e zonës. Gjithashtu, të tre këta shtetas kanë kundërshtuar punonjësit e patrullës së përgjithshme të Komisariatit të Policisë Kurbin, të cilët kanë ndërhyrë për të lëvizur automjetin dhe për të marrë masa për largimin e tyre.” thuhet në njoftimin e autoriteteve.
Materialet i kaluan Prokurorisë për veprime të mëtejshme.
