Rreth 21 mijë euro janë sekuestruar nga autoritetet në aeroportin e Kukësit, që kanë proceduar një 35-vjeçar i cili nuk i kishte deklaruar sipas ligjit.
“Shërbimet e Policisë Kufitare të aeroportit “Flatrat e Veriut”, në hyrje të RSh-së, kanë kaluar në vijën e dytë, për kontroll të imtësishëm shtetasin Sh.S. Gjatë kontrollit, në çantën e shtetasit Sh.S., shërbimet e Policisë gjetën 20 980 euro që ky shtetas tentonte t’i fuste në vendin tonë, pa i deklaruar konform ligjeve në fuqi. Në vijim të veprimeve procedurale për këtë rast, specialistët për Hetimin e Krimit Ekonomiko-Financiar të DVP Kukës referuan materialet në Prokurori ku nisi procedimi në gjendje të lirë për shtetasin Sh. S., 35 vjeç, banues në Kukës, për veprën penale ‘Mosdeklarimi në kufi i të hollave dhe i sendeve me vlerë’”, njoftoi policia.
Në cilësinë e provës materiale u sekuestrua shuma e parave.
