Rivali i Lulzim Bashës për kreun e PD-së vulës, Gjergji Hani, ka prezantuar mesditën e kësaj të Marte platformën e tij për të marrë drejtimin.
Në një konferencë me gazetarët, Hani u shpreh se ka qënë mbështetës i Lulzim Bashës, por shtoi se premisat e tij nuk janë të qarta dhe prandaj ka vendosur të futet vetë në garë.
“Erdhi në një moment kur e prisja. Kam qenë një nga mbështetësit më të mëdhenj të Bashës dhe prisja që rikthimi i tij në skenën politike të kishte premisa të qarta mbi çfarë ndan PD nga Sali Berisha, cila është filozofia politike e kësaj partie që në 32 vite nuk e ka pasur kurrë dhe cilat ishin mënyrë që ai do të përdorte për rindërtimin e Partisë Demokratike.
Në këto 32 vite PD nuk ka bërë kurrë pazare politike që do i toleroja. Isha i bindur që zoti Basha do të kthehej me këto premisa. Kur pashë që asnjë nga këto premisa nuk qëndronte. Flet për hapje të partisë por pa specifikuar në cilat forma. E ndjeva si një sfidë personale për demokratët”, deklaroi Hani.
Gjatë fjalës së tij, Hani u ngrit nga tryeza duke lënë gazetarët në pritje për të marrë syzet. “Do më falni se mosha të bën të sajën, kam harruar syzet andej po shkoj t’i marr”, u shpreh ai.
