Ukraina sulmoi një urë në rajonin jugor të Khersonit me gadishullin e Krimesë, duke përdorur raketa britanike me rreze të gjatë veprimi. Denoncimi erdhi nga guvernatori i instaluar nga Rusia në rajonin e pushtuar të Khersonit, Vladimir Saldo. Sipas tij, dy urat paralele Chongar, apo siç njihen ndryshe Porta e Krimesë, kanë pësuar dëmtime dhe trafiku ishte devijuar.
Saldo tha se me gjasë ishin përdorur raketat British Storm Shado, në një sulm që sipas tij është urdhëruar nga Londra.
Deri më tani, nuk ka pasur komente nga Kievi, po ura lidhëse me Krimenë dhe po ashtu me qytetin e pushtuar të Melitopolit besohet të jetë mes shënjestrave të kundërofensivës së Kievit, e nisur më herët gjatë muajit.
Në videomesazhin e fundit, presidenti Volodymyr Zelensky foli për beteja të ethshme në front dhe tha se kundërofensiva ishte më e ngadaltë nga sa po shpresohej. Ai akuzoi Rusinë se po përgatit një akt terrorizmi në centralin e pushtuar të Zaporizhias. “Shërbimet tona të zbulimit kanë marrë informacione se Rusia po konsideron skenarin e një akti terrorist në Zaporizhia; një akt terrorist me lëshimin e rrezatimit radioaktiv. Ata kanë përgatitur gjithçka për këtë”, tha presidenti.
Forcat ruse ndërmorën një valë të re sulmues rreth Ukrainës, përfshirë qytetin e lindjes së Zelenskyt, Krivi Rih dhe portin jugor të Odesës. Në një deklaratë presidenti Vladimir Putin tha se kundërofensiva ukrainase është e përgjumur dhe se Kievi ka pësuar humbje të mëdha në sulmet në jug të vendit.
