Është shtyrë seanca në Gjykatën e Posaçme ku ishte planifikuar të dëgjohej mbrojtja e 9 të pandehurve për procesin e inceneratorit të Elbasanit.
Mësohet se gjatë seancës së sotme ka bërë mbrojtjen vetëm Jonida Zeqo e cila ka kërkuar pushimin e çështjes. Ndërsa, Lefter Koka, Alqi Bllako dhe të pandehurit e tjerë, kanë kërkuar kohë që të përgatisin mbrojtjen.
Seanca e radhës, ku pritet të dëgjohen konkluzionet e Mbrojtjes u caktua në 6 Korrik, ora 09:00. Në pretencë SPAK kërkoi fajësi për gjithë të pandehurit, ndërsa dënimi më i rëndë me 6 vjet e 8 muaj burg është kërkuar për Lefter Kokën dhe biznesmenët në kërkim Mirel Mërtiri e Klodian Zoto.
