Mazhoranca e drejtuar nga kryeministri Edi Rama nuk pranoi asnjë nga propozimet e opozitës për postin e Avokatit të ri të Popullit gjatë sesionit të kaluar parlamentar. Këtë mendësi, socialistët e kanë mbartur edhe në sesion të ri.
Në komisionin e ligjeve është miratuar një listë me 15 kandidatë të mundshëm për këtë pozicion.
Drejtimi i këtij institucioni i është lënë historikisht opozitës si një marrëveshje e pa shkruar politike, megjithatë Rama synon që këtë herë ta përvetësojë.
Në seancën e sotme parlamentare, kryetari i grupit parlamentar socialist Taulant Balla duke iu drejtuar deputetëve të opozitës artikuloi: “Avokatin e Popullit, s’keni të drejtë ta emëroni”.
“Duhet të arrihet një konsensus”, tha Balla por mohoi se do të kete bisedime me Partinë Demokratike të drejtuar, nga Sali Berisha.
Bisedimet, ndërkohë, i kërkoi me deputetët e partisë së vulës. “I propozoj kryetarit të grupit parlamentar të PD-së, Bardhi që të ulemi gjatë javës së ardhshme bashkë me drejtuesit e komisionit të Ligjeve, me zonjën Bushak e Çupi, në mënyrë që të bëjmë një verifikim të kandidaturave që kemi përballë, para nesh. Të fillojmë të shkojmë drejt një grupi me 3-4 kandidatura, që marrim më shumë konsensus. Më pas secili prej nesh të kërkojë mbështetje. Mendoj se ky është një model që duhet konsoliduar”, tha Balla.
Sesionin e kaluar parlamentar, nga opozita u hodhën akuza se Rama synonte të zgjidhte Ardian Dvoranin në postin e Avokatit të Popullit. Rama, nga ana tjetër, nuk pranoi që të votonte kandidaturën e opozitës.
Ndërkohë, këtë herë kryetari i PD-së Sali Berisha ka akuzuar se kryeministri projekton për këtë të post anëtarin e KAS, Ilir Rusmaili.
Avokati i Popullit zgjidhet nga parlamenti me shumicë të cilësuar – të paktën 84 vota.
