Zbardhet dosja e SPAK, e cila ditën e djeshme urdhëroi Policinë e Shtetit që të ushtronte kontrolle të befasishme në kampin e muxhahedinëve në Manzë të Durrësit.
Kontrollet në fjalë sollën reagimin e ashpër të banorëve të këtij kampi, të cilët u përplasën me forcat e rendit, ndërsa 15 efektivë u plagosën, po ashtu mbetën të plagosur dhjetëra muxhahedinë dhe një tjetër gjeti vdekjen.
Mediat kanë publikuar dosjen mbi të cilën argumentohet dhe ndërhyrja e policisë në kampin e MEK, për të ushtruar kontrolle dhe për të bllokuar disa pajisje elektronike, mes tyre laptopë. Në dosjen në fjalë thuhet se ka dyshime që nga organizata MEK, të kryheshin sulme kibernetike në drejtim të Republikës Islamike të Iranit.
“Është referuar fakti se dyshohet se nga organizata “MEK” (Organizata e Muxhahedinëve të Popullit të Iranit) nga territori i Republikës së Shqipërisë ka kryer sulme kibernetike ndaj Republikës Islamike të Iranit në disa periudha të ndryshme kohore si dhe drejt disa institucioneve në shtetin iranian. Duke qenë se statusi i qëndrimit të organizatës MEK në Shqipëri është humanitar, Republika Islamike e Iranit në vazhdimësi ka pretenduar duke ngritur këto dyshime si dhe në mënyrë të vazhdueshme kërcënon se do të ndërmarrë sulme ndaj Shqipërisë dhe organizatës MEK”, -thuhet në vendimin e Gjykatës.
- Reagimi i Departamentit Amerikan te Shtetit
Departamenti Amerikan i Shtetit (DASH) e ka përkrahur aksionin policor të Shqipërisë më 20 qershor, kur Policia e Shtetit kreu kontrolle në kampin e Manzës së Durrësit, ku janë të strehuar rreth 3.000 pjesëtarë të opozitës iraniane.
Drejtori i Përgjithshëm i Policisë së Shtetit, Muhamet Rrumbullaku, ka konfirmuar se gjatë këtij aksioni ishin lënduar 15 zyrtarë policorë dhe 21 anëtarë të Organizatës së Muxhahedinëve të Popullit të Iranit (MEK).
“Policia e Shtetit në Shqipëri na ka siguruar se të gjitha veprimet janë kryer në përputhje me ligjet në fuqi, përfshirë mbrojtjen e të drejtave dhe lirive të të gjithë personave në Shqipëri. Ne mbështesim të drejtën e Qeverisë së Shqipërisë për të hetuar çdo veprimtari të mundshme të paligjshme brenda territorit të saj”, ka thënë një zëdhënës i Departamentit amerikan të Shtetit.
Zëdhënësi i DASH-it gjithashtu shtoi se SHBA-ja nuk e cilëson MEK-un “lëvizje opozitare të qëndrueshme demokratike që përfaqëson popullin iranian”, por ka “shqetësime serioze për MEK-un si organizatë, përfshirë akuzat për abuzim të kryera kundër anëtarëve të tij”.
- Çfarë ndodhi mëngjesin e 20 qershorin në kampin e MEK?
Prej mëngjesit të sotëm (20 qeshor) forca të shumta të Policisë së Shtetit, përfshirë edhe forcat RENEA kanë zbarkuar në një megaoperacion në kampin MEK në Durrës, për të ushtruar kontrolle në të gjitha ambientet dhe zyrat ku janë strehuar aktivistë të opozitës iraniane.
Por policia shqiptare pretendon se lajmet e publikuar në media nuk janë të vërteta. Burimet mediatike bëjnë me dije se përplasja mes policisë ka ndodhur për shkak se iranianët nuk kanë pranuar të dorëzojnë kompjuterat dhe serverat.
- Probleme me frymëmarrje, disa të shtrirë marrin oksigjen, PAMJE nga brenda spitalit të muxhahedinëve në MEK
Brenda ambienteve të spitalit, i cili ndodhet në kampin e MEK, shihen disa persona të plagosur dhe e pranishme është edhe ambulanca.
