Ishujt Faroe-Shqipëri është një ndeshje historike, për vetë faktin se asnjëherë ekipet kombëtare nuk janë përballur mes tyre, qoftë edhe në miqësore.
Sot në orën 20:45 në stadiumin “Torsvullur”, që ka një kapacitet prej 6040 vendesh, kuqezinjtë do të përballen me një të panjohur të madhe, që në dekadën e fundit ka bërë jo pak surpriza.
Ishujt Faroe nuk janë San Marino, Lihtenshtejni apo Gjibraltari, madje në renditjen e FIFA-s janë shumë më lart edhe se Moldavia, që kuqezinjtë mposhtën vetëm tri ditë më parë në “Air Albania”.
Një nga fitoret më të bujshme të viteve të fundit të kundërshtarit të Shqipërisë është pikërisht ajo kundër Turqisë me shifrat 2-1 më 25.09.2022, e vlefshme për Ligën e Kombeve.
Që prej vitit 2019, Kombëtarja që përfaqëson shtetin me një popullsi prej 54 mijë banorësh dhe ka si kryeqytet Torshavnin me 22 mijë banorë, drejtohet nga trajneri suedez, Hakan Erikson.
Ky i fundit është një 63-vjeçar që më parë ka drejtuar Kombëtaret U-21 dhe U-23 të Suedisë.
Ylli i skuadrës është sulmuesi Klamint Olsen, i cili ka realizuar 10 gola me fanellën e Kombëtares në 56 ndeshje të luajtura deri më tani që nga viti 2012 kur është grumbulluar për herë të parë. Ai aktivizohet në Islandë me Breidablikun.
Ndërkohë, në historinë e shtetit të vogël që nisi të luante ndeshje ndërkombëtare prej vitit 1988, fitoret më të bujshme i takojnë periudhës 2014-2015, kur brenda një edicioni eliminator për Europianin 2016, mposhtën dy herë Greqinë (0-1 në Athinë dhe 2-1 në Torshavn).
Për të gjitha këto fakte, të besuarit e Silvinjos i pret një ndeshje e vështirë, për më tepër që u duhet me patjetër fitorja.
