Kryetari i PD-së, Sali Berisha ka mohuar se ka sulmuar ish-kryebashkiakun demokrat të Shkodrës Bardh Spahia, pasi ky i fundit priti në një takim Benet Becin.
Takimi u zhvillua një ditë më parë në ambientet e Bashkisë, me Spahinë që deklaroi se pritjen e kryebashkiakut të ri të PS bëri “me kulturën e qytetarisë me të cilën jam rritur dhe e kam trashëguar prej Shkodrës time.”
Më tej shtoi se “në ato 10 minuta takim, i përsërita z. Beci ç’ka kam shprehur publikisht në mënyrë të përsëritur, se në Shkodër nuk pati zgjedhje, por një masakër të vërtetë elektorale, ku votat u blenë masivisht me milionat e eurove të hedhura nga pushteti, u grabitën me dhunë e kërcënime të paprecedent nga krimi i organizuar i mbështetur dhe koordinuar nga vetë shteti, të shoqëruara me retorikën shantazhuese të kryeministrit, për mosdhënie investimesh për Shkodrën”.
Në emision “Publikisht” në RTSH, Berisha u pyet këtë të martë nëse e ka sulmuar Bardh Spahinë për takimin me Becin.
“Jo absolutisht. Unë e lexova sot. Ai kish sqarue qartësisht se mandati i tij u vodh, këtë bëri ai”, tha Berisha.
