Ish-efektivi i forcave operacionale të Policisë, Jeton Lami është dënuar me 2 vite e 10 muaj burg nga Gjykata e Lezhës. Për shkak të gjykimit të shkurtuar Jeton Lamit, i ulet 1/3 e dënimit.
Agjenti i policisë u arrestua në 24 gusht të vitit të kaluar, pasi në dy momente doli nga kamerat filmike, teksa shoqëronte Ervis Martinajn, personin e shumëkërkuar nga SPAK, për akuzën e “Sigurimit të kushteve dhe mjeteve” me qëllim vrasjen e Endrit Dokles.
Pas arrestimit ai nuk ka pranuar të flasë mbi akuzën që rëndon ndaj tij, ajo e shpërdorimit të detyrës apo edhe për bashkëpunimin e të kërkuarit me efektiva të tjerë të policisë.
Ndoshta, dëshmitë e tij, do të mund të zbulonin më shumë mbi “fatin” e Ervis Martinajt, i cili rezulton i zhdukur që më 8 gusht të vitit 2022. Në dëshminë e tij për Prokurorinë, Jeton Lajmi dha disa detaje për sa i përket shoqërimit të Ervis Martinajt, por mohoi të ketë dijeni për zhdukjen e tij. Ai deklaroi se Martinajn e ka njohur 10 vite më parë, por theksoi se nuk ka pasur miqësi apo lidhje të ngushtë.
“Ervis Martinajn e kam njohur 10 vite përpara. Me atë nuk kam pasur asnjë miqësi apo lidhje të ngushtë. Megjithatë tre ditë para se ta shoqëroja në Durrës, e kam takuar rastësisht tek një ambient te Zogu i Zi. Më ka kërkuar ta shoqëroja. E kam shoqëruar në drejtim të Durrësit dhe e kam dërguar në një hotel ku u takua me një mikeshën e tij. Të nesërmen kam shkuar sërish në Durrës, e kam marrë Ervis Martinajn dhe mikeshën e tij dhe i kam lënë në një ambient pranë një karburanti në zonën e Vorës. Aty sipas informacioneve që kisha Ervis Martinaj do të bënte disa takime. Në atë moment jam shkëputur me të dhe nuk kam asnjë dijeni se çfarë ka ndodhur me të”, ka deklaruar për prokurorin Jeton Lami.
Shoqërimi me Vis Martinaj
Më 5 dhe 7 gusht, Lami ka transportuar ndërmjet Durrësit dhe Tiranës biznesmenin Ervis Martinaj. Lami u kap nga kamerat e sigurisë së një hoteli në Durrës, ku ka qenë i shoqëruar me Ervis Martinajn. Për herë të parë hetuesit kanë mundur të zbulojnë se më 5 Gusht 2022 Lami e merr Martinajn në zonën e veriut në një automjet luksoz ‘Audi “A8” dhe e transporton atë drejt Durrësit në një hotel në praninë edhe të një vajze ende të paidentifikuar. Më 7 Gusht policia ka imazhin e fundit nga Ervis Martinaj në qytetin e Durrësit dhe të Tiranës tek një hotel, ndërsa më 10 Gusht xhaxhai i tij Faik Martinaj ka bërë denoncimin në polici për humbjen e kontakteve me nipin.
