Partia e Lirisë i ka bërë thirrje SPAK-ut që të nisë hetimin ndaj zyrtarëve të lartë, pas vendimit të Kolegjit Zgjedhor që vendosi ripërsëritjen e zgjedhjeve në Bashkinë e Rrogozhinës, pas problematikave të krijuara me kutinë e burgut.
Nënkryetari i Partisë së Lirisë, Endrit Braimllari, deklaron se hetimi duhet të nisë duke filluar nga Edi Rama, Erion Veliaj si sekretar politik, Ulsi Manja, Drejtorin e Përgjithshëm të Burgjeve dhe Drejtorin e Burgut të Rrogozhinës.
“Në Bashkinë e Rrogozhinës, ku kandidati i ‘Bashkë Fitojmë’ Shkëlqim Hoxha dukshëm ishte fitues në të gjitha kutitë, dhe duhej vetëm kutia e votimit në burgun e Rrogozhinës për të përmbysur rezultatin. I bëjmë thirrje institucioneve të drejtësisë, SPAK-ut në veçanti që nuk ka arsye të heshtë.
Tani që ka pavlefshmëri të kutisë së burgut të Rrogozhinës, duhet të kishte nisur hetimin për zyrtarët e lartë në këtë manipulim. Duke filluar nga Edi Rama, Erion Veliaj si sekretar politik, Ulsi Manja, Drejtorin e Përgjithshëm të Burgjeve dhe Drejtorin e Burgut të Rrogozhinës. Është e qartë që skema e Rilindjes ka qenë e njëjtë në të gjithë Shqipërinë, duke sjellë në krye kryetarë bashkie të papërgjegjshëm, arrogantë, shkelës të ligjit që vënë interesin personal mbi atë të qytetarëve”, tha nënkryetari i Partisë së Lirisë, Endrit Braimllari.
Kujtojmë se diferenca mes dy kandidatëve për Bashkinë e Rrogozhinës ishte vetëm 20 vota dhe ishte kutia e burgut ajo që ktheu përmbys rezultatin, duke i dhënë fitoren kandidatit socialist, Edison Memolla
