Skënderbeu zyrtarizon afrimin e parë në merkato e verës. Bëhet fjalë për mbrojtësin e majtë korçar, Klevis Shaqe, i cili ka firmosur ditën e djeshme një kontratë 2-vjeçare me klubin bardhekuq.
Pas mbylljes së aventurës te Tomori në Kategorinë e Parë, 23-vjeçarin Shaqe ka vendosur të vijojë karrierën në vendlindje, pikërisht aty ku ka dalë si lojtar. Më parë ai ka luajtur edhe te Besa, Pogradeci, Turbina dhe gjithashtu në një periudhë të shkurtër me Drenicën në Kosovë.
Me afrimin e Shaqes, korçarët plotësojnë një hapësirë të rëndësishme në linjën e majtë. Bëhet fjalë për një futbollist që luan në këtë krahë, qoftë në fazën defensive, ashtu edhe si mesfushor krahu.
Ky përforcim plotëson mangësinë e sezonit të kaluar në kampin bardhekuq, duke qenë se pas largimit të Vangjel Zguros, në ekip ishte vetëm Ergi Zenullari si alternativë në të majtë. Ndërkohë, dje është konfirmuar edhe rinovimi me portierin Herdis Alliu edhe për sezonin e ri. Pas përfundimit të kontratës me librazhdasin, klubi e ka parë të udhës që t’i japë besim edhe për një tjetër sezon.
Alliu do të vijojë të jetë portieri i dytë i bardhekuqve, së bashku me Dervishajn nga të rinjtë, ndërsa pritet që porta të plotësohet me afrimin e radhës, që përflitet se është nga Seria C e Italisë, por që ende nuk ka asgjë zyrtare nga klubi.
Tre lojtarë deri më tani mund të quhen largime zyrtare te korçarët. Bëhet fjalë për Shkëlzen Ruçin, Uendi Vecajn dhe Dritmir Becin. Nëse portieri ishte titullari i sezonit të kaluar, dy të tjerët nuk arritën dot të linin shenjë në Korçë, edhe për shkak të dëmtimeve të shumta që pësuan. P
ër këtë arsye, marrëdhënia është ndërprerë me lojtarët në fjalë. Në Korçë janë edhe katër futbollistë të tjerë që janë me kontratë të përfunduar.
Oltion Rapa, Agnaldo Moraesh, Hektor Idrizaj dhe Abdul Temitope mbyllën kontratën në fund të sezonit, ndërsa ende nuk ka asnjë zyrtarizim për rinovimin e tyre. Bisedimet me drejtuesit e klubit janë zhvilluar me secilin lojtarë, por nuk ka pasur konkretizim. Gjasat janë që asnjë prej tyre të mos rinovojë.
