Marrëdhëniet mes Tiranës dhe Prishtinës zyrtare kanë shënuar pikën më ulët historike, pas veprimit të njëanshëm të kryeministrit Edi Rama i cili anuloi mbledhjen e përbashkët të dy qeverive.
Pavarësisht kësaj, përfaqësues të mazhorancës thonë se marrëdhëniet me Kosovën mbeten prioritet i qeverisë.
“Për ne Kosova është e shenjtë”, u shpreh këtë të Enjte nga foltorja e parlamentit ministrja e Jashtme Olta Xhaçka.
“Për ne Kosova është një prioritet kombëtar që udhëheq çdo veprim e çdo aksion në politikën tonë të jashtme”, shtoi ajo.
Megjithatë, kryediplomatja deklaroi se “kjo nuk do të thotë që ne të mbështesim 100% e në mënyrë të pakushtëzuar qeverinë e Kosovës në çdo hap që ajo bën edhe kur jemi të bindur që ajo që po bën është një gabim i me pasoja mjaft të rënda për Kosovën”.
“Kjo nuk do të ishte mbështetje për Kosovën. Kjo do të ishte e papërgjegjshme dhe le të bërtasin sa të duan analistët dhe kinse patriotët e rrjeteve sociale, kjo nuk ka për të ndodhur kurrë. Është e domosdoshme që situata të shtensionohet. Është e domosdoshme që qeveria e Kosovës të dëgjojë partnerët tanë ndërkombëtarë, aleatët tanë, SHBA e BE, për shtensionimin e situatës. Është e domosdoshme që të ndalet thellimi i hendekut të qëndrimeve me SHBA e BE sepse pasojat janë vërtet të rënda”, tha Xhaçka.
