Partia e vulës pritet të zhvillojë nesër në 17:00 mbledhjes e radhës së kryesisë pas asaj të disa ditëve më parë, ku pati përplasje dhe përçarja mes dy grupeve u thellua.
Një grup deputetësh që mbështesin Alibeajn (Taulant Zeneli, Endri Hasa, Gazmend Koduzi, Taulanda Jupi, Kreshnik Çollaku, Xhemal Gjunkshi, Gentian Gaba), sipas një njoftimi të PD-së së vulës, bënë kërkesë për mbledhjen e Kryesisë.
Pikat në rendin e ditës parashikojnë avancimin e përgatitjeve për zgjedhjen e kryetarit të ri, që u caktua në mbledhjen e fundit të zhvillohet më 29 Korrik.
Data u votua nga mbështetësit e Alibeajt. Ndërkohë, grupi i deputetëve, në përbërje të të cilit ishin Gazmend Bardhi, Dashnor Sula, Bledion Nallbati, Helidon Bushati, Jorida Tabaku, Lefter Gështenja, Sajmir Koreshi e të tjerë kërkuan zhvillimin e zgjedhjeve së pari nëpër degë e më pas për kryetar. Po kështu, u kërkua nga ata një bashkim i Partisë Demokratike.
Megjithatë, grupi i Alibeajt doli fitimtar në këtë përplasje, në një kohë kur janë shtuar zërat se po i hapet rruga rikthimit të Lulzim Bashës si kryetar në krye të PD-së së vulës. Ky i fundit ka zhvilluar disa takime të pasqyruara në media dhe ka intensifikuar reagimet publike, pas një shkëputje në këtë aspekt që prej largimit si kryetar i partisë.
