Kroacia është finalistja e parë e këtij sezoni në Ligën e Kombeve. Skuadar e Zlatko Daliç ka mundur me shifrat 4-2 pas kohëve shtesë Holandën, në ndeshjen e luajtur në Roterdam.
ishin “Tulipanët” që kaluan të parët në avantazh me anë të Maalen në minutën e 34-të.
Skuadra e drejtuar nga trajneri Ronald Kuman e mbylli në avantazh fraksionin e parë, ndërsa në të dytën, skenarët ndryshuan.
Kroatët dolën nga dhomat e zhveshjes me një marsh më shumë, teksa ballkanasit fillimisht barazuan në minutën e 54-të me anë të Kramaric që nuk gaboi nga pika e bardhë e penalltisë.
HOLANDE-KROACI | GOLAT E NDESHJES
Kur pritej një reagim i Holandës, miqtë shënuan sërish duke marrë avantazhin në të 72-tën me anë të Pasalic që në brendësi të zonës nuk gaboi.
Në minutat e mbetura, Holanda u hodh e gjitha në sulm për të gjetur golin e barazimit dhe në fakt ia doli kur shënoi në minutën e 97-të me anë të Lang.
Në këtë formë, sfida shkoi në shtesë, aty ku në minutën e 100-të, Kroacia u rikthye sërish në avantazh. Ai që shënoi ishte Petkovic me një goditje preçize nga distanca. Në minutën e 116-të, Malacia gaboi dhe shkaktoi një penallti pas një ndërhyrje të gabuar ndaj Petkovic.
Nga pika e bardhë, Luka Modric nuk gaboi dhe shënoi golin e katërt dhe atë që mbylli përfundimisht ndeshjen me rezultatin 2-4.
Tashmë, në finalen e së dielës mbrëma, ballkanasit presin fituesin e çiftit Spanjë-Itali, takim që luhet nesër.
