Kryeministri Edi Rama në një konferencë për mediat ka paralajmëruar se ndaj shtetit të Kosovës mund të merren masa shtrënguese.
Pas anulimit të mbledhjeve mes dy qeverive, Rama tha se tensionet në Veri po e çojnë Kosovën drejt shkëputjes me bashkësinë euroatlantike.
“I kam kërkuar Albinit për t’u takuar në Gjakovë për të diskutuar tensionet në Veri, e cila po e çan Kosovën me bashkësinë euroatlantike në një pikë të paimagjinueshme, ku kjo e fundit ka vendosur gishtin në planin e saksioneve, ndaj shtetit që e ka krijuar vetë. Me shumë keqardhje duhet të them se nuk kemi pasur dakortësi me Kurtin për një ndryshim të formatit, kërkoi që mbledhja të mbahej normalisht por kjo nuk është e mundur pasi nuk është një moment për të krijuar një pasqyrë të rreme me atë që po ndodh me realitetin e Kosovës. Mbase nuk është një përgjigje përfundimtar, shpresoj të takohemi për të ballafaquar opinionet në kushtet kur jemi në prag të planit të sanksioneve, masave shtrënguese ndaj një shtetit që është krijuar nga ata që qartësisht janë në kushtet e sosjes së durimit. Kam bërë një përpjekje për të marrë edhe pak kohë, nëse nuk e zhvillojmë për një sens të përbashkët kam frikë se plani që është plan realisht shumë i rëndë për Kosovën, do vihet në lëvizje”, tha Rama.
Kryeministri Edi Rama njoftoi se nuk do ketë një mbledhje të përbashkët mes qeverive të Shqipërisë dhe të Kosovës, për shkak se kryeministri i Kosovës, Albin Kurti nuk pranoi një format të ngushtë mes kryeministrave, ministrave të Jashtëm dhe ministrave të Mbrojtjes.
Rama e pranoi se Kurti i kishte thënë se mbledhja duhet të mbahet, ndërsa më pas mund të ketë një takim mes tyre. Disa herë, Rama përsëriti se Albin Kurti mund të sanksionohet.
