Në Korçë ka nisur puna për ndërtimin e ekipit të Superiores dhe ditët në vijim pritet të jenë intensive sa i përket merkatos në hyrje.
Mësohet se trajneri Ivan Gvozdenoviç ka kërkuar që të ketë gati 50% të ekipit brenda kësaj jave dhe drejtuesit janë duke bërë maksimumin që të zyrtarizojnë goditjet e para në merkato.
Reparti i parë që mund të quhet i mbyllur është porta, teksa mësohet se është gjetur gardiani të cilit do t’i besohet fanella e titullarit për sezonin e ri. Bëhet fjalë për një portier të ardhur nga Italia, konkretisht nga Seria C, emri i të cilit mbahet i fshehtë nga klubi korçar për shkak të negociatave. Do të jetë pikërisht ky përforcim që do të sigurojë repartin e portës.
Nga ana tjetër, mësohet se alternativa për të marrë portierin e Shkëndijës së Tetovës, Kostadin Zahov, ka rënë, pasi ky i fundit ka preferuar të qëndrojë me kuqezinjtë, duke rinovuar marrëveshjen. Edhe pista për Edmir Salin duket se po bie, pavarësisht se palët kanë pasur bisedime dhe gjërat kanë qenë në rrugë të mbarë.
